فيه ناس كتير بتبكي وبكاها 
من غير دموع 
وناس تانية برضه بتبكي بس 
بكاها على الشيوع .
وناس بتضحك وهى بتبكي 
بس ضحكتها ولعه نار
وفيها... قهر.... وفيها المرار
بس لازم برضه تضحك 
عشان تحسس كل فاجر 
من الفجار 
إن الليل.... طلع له نهار
وناس تانيه... عيشه دنيا 
والدموع سكناهم ليل نهار 
لفراق وحيدهم اللي صلى 
ولبه الندا ف عمر الزهور 
واللي مات غرقان في دمه
مات شهيد مع الأبرار
واللي أتكوى جوه ف قلبه 
من غدر حبيبه الغدار
واللي بيته على الحديده 
ومن غير فرش وكله غبار 
واللي نزل من بطن أمه 
شغال مرابع في كل دار
ودموع كتيره على شاكلته 
ف كل حاره وكل دار
وبقت الدموع في زيادة
تشق لها بحور وانهار
والضمير واخد أجازة 
وأجازته طالت وبقت أحتكار
ولحد أمتى هانشوف ونسكت
والدموع بتنشع ف الجدار 
وكل جار عامل عبيط 
ولا راضي يمسح دمعه فقير 
ولا حتى يمسح على راس يتيم 
ليخفف عنه الدموع 
ويقصر عليه المشوار