جدع بلا جاه
مرسي الهموم قلبه
أحسن نعيش
في الهوان 
والحر يصعب
عليه دمعه
وحكايه برويها
بس اللي يسمع مين
وقلبي كان
شايل جراحكم
طفيتوا ليه شمعه
كل أحلامنا 
بقت هدمه ورغيف
وانا شعري لون الطين
والحق أصبح
هزيل وضعيف
لترضا بالفتوي
لترضا بحد السيف
والظلم عدي المدي
والحلم لسه كفيف
والحرف
عينيه معصوبه
و بيعافر يا مستمعين
ومولانا متكيف
طعم الجوع
غير طعم الرجيم
واللي شايل علي 
كتفه قروانه
غير اللي بيصيف
يا بلدي إحنا من
زمان فريقين
فريق للنوادي
والغوازي
والبارات والتطبيل
وآخر الليل
يتعشي ويروح
وفريق
مطحون مغلول
متهان منداس 
وعلي قوت
عياله متسوح
ومن همه يقول
يا معين
انتم فريق 
القصور والداده
والصفرجي والباص
واحنا فريق
الهموم 
والسجن والغاز
المسيل والرصاص
والدين
من طلعه الفجر
والباشا يلعب تنس
وجنيه بالبسين
مليانه ورد وفل
يسعي الفقير 
علي قوته
والشمس حارقه قفاه
واللقمه متغمصه بالذل
أشرب كمان ياحزين
انا ابن البلد 
وعرقي في جبيني
ساعه ما قولت تعبت
شككتوا في ديني
انا اللي بنضرب
في أي كمين
وبتفتش وبتهان
وانا اللي بتشد اشتباه
من وسط أي ميدان
وساكت علشان خايف
وانا اللي صابر
ومستحمل
انا اللي بقطع
في الصلا
وتقولوا عليه إخوان
انا مين
انا اللي حلفت ما اخونك
وانا الغرقان في ديونك
يا نن العين
انا مين
انا تمرد وسبعه الصبح
وسته ابريل
وانا حمدين
انا مين فيهم
انا الاخوان
وشعري جبان
وانا الشرعيه للعسكر
وانا المتغطي بحرامك
ومن ذلك انا بسكر
وانا زويلك
ويادوب بفك الخط
وانا اللي شعري شاب
في همومك
وبادوب بحبي وانط
وانا المسكين
وانا اللي شربت
لما فطست من نيلك
وانا ابنودك ومواويلك
وانا سقراط وكلي احباط
وانا فلولك
بموت. في الحبكه والتسخين
أنا الميت 
وانا عايش
وانا اللي شايف 
وعامل نفسي 
مش شايف
وشال الطين
وانا اللي 
نهشته في عرضه
وشحتوه
وبعتوا في أرضه
وانا المالك 
الاصلي في ارضك
وحقي فين
وانا المنشد
وانا الشاعر
بوجعك واحزانك
وانا يوم الجمعه مبخرتك
وفي التراويح ورا امامك
وأقول آمين
انا مين