فى الشارع 
ناس كتير ماشيه
سليم وصحتو بآشيه 
إللى بيفكر واللى بيدور 
واللى ماشى وراه حاشيه
مشاكل البشر بالكوم 
زكايب ماشيه شايله هموم
واحد مراتو مطلعه عينو 
والتانى زادت قوى ديونو 
الواد عاوز فلوس الدرس
والبت عاوزه شوار وترص
فلوس الشهر خد وهات
كلو رايح على الاقساط
وشاب هناك ماشى مبوز 
معاهوش ونفسو يتجوز
والست ماشيه زعلانه 
جوزها ماشى مع فلانه
عيونها عليه مفتحه
قال رايح يقضى مصلحه 
جيوب فاضيه ومفلسه 
وعيال خايبه فى المدرسه
والبت نفسها ف عريس 
جالها واحد طلع خسيس
حاجات جايبالهم الكافيه 
ماشيين فى الدنيا بالعافيه
الناس بتكلم نفسها 
قرب هتسمع حسها 
اللى خالف واللى تالف 
واللى ماشى غلط وخايف
فى الشارع ناس كتير ماشيه 
سليم وصحتو بآشيه