ياعم سيبنى متحيرنيش 
ولو سمعت متقوليش 
زهقت من كتر الكلام 
متسيبنى عايش والسلام
وحياتى عندك سيبنى اعيش 
طول النهار شغال نصايح 
بتخلى عقلى منى رايح 
بتبيع كلام وانا مشتريش 
وفر نصايحك ليك ياعم 
متشيلنيش معاك الهم 
وقول عليه متعرفنيش 
أنا إنسان هادى وبسيط
أو حتى قول عنى عبيط
أكتر من إسمى متسألنيش
دماغى رايقه ومش محتاجه
مش عاوز اعرف فى الدنيا حاجه 
سيبنى أضحك متزعلنيش
قوللى كلام لو كان يفرح 
خلينى اغمض عينى وأسرح 
نفسى يكونلى جناح وريش 
أطير لفوق فى السما بعيد
وابنيلى عش هناك جديد 
لاشوف عمامه ولا شاويش