هتقول ايه وتعيد ايه 
إتنيل اسكت يا قلم 
وفر حبرك واقفل عليه
وشيل حروفك جواك ولم
إياك تقول الضحكه عليت
وللا السحابه السودا مشيت
وللا عيون الغوله عميت
دا لسا فينا صناع ألم
إياك تقول طلع النهار
وللا ليلنا راح وغار
أو دخلنا فى العمار
دا لسا فينا غريب أطوار
ضد رفعك للعلم
فينا نرفع .. وينزلوه
وبنعدله .. وبيقلبوه 
وفينا بيحاولوا يزيلوه
ويفجروه عند الهرم
وفينا بردو اللى بيفرح 
لما السكينه فينا تدبح 
فى خسارتنا هوا يربح
وفينا مش ناوى يتلم 
فينا طرح بعد جمع
وفينا دمع وطفى شمع 
وفينا وجع من شوف وسمع 
على وطنا اللى انظلم
هتقول ايه وتعيد ايه 
إتنيل اسكت يا قلم