بمناسبة ذكرى وفاة  " الخال "

 عبد الرحمن الأبنودي 

________________

"  ضحكة  ملاك  " 

________________

وصل الخبر وعم السكات .. 

الخال رحل الخال مات  .. 

هيطول الغيبه هناك .. 

وانا مستحيل أخد عزاك ..

مستحيل اخد عزاك

إزاي تموت   ..؟ 

وانت عايش جوا مني 

نبض روحي من ضياك .. 

إزاي تموت ..؟ 

وانت الكتاب

اللي يصاحبني

بافتحك واسهر معاك  ...

ألف رحمة  ونور ياخال

وحشتني  وعز السؤال

غمضت عيني لاجل اشوفك

قالتلي عيني ياخال محال

قوم ياواد انظم حروفك 

عيش حقيقة مش خيال

ولما جيت انظم حروفي 

عشان اشوفك  .. 

لقيت حروفي ميسره 

نظمت سيجال  .. 

كتبت مربع توصفك 

لكن مربع ضحكتك 

طاغي الجمال  .. 

واشتاق يوماتي لطلتك

وحالي حال  .. 

وطلعت أدور ف الوشوش

على ضحكة تشبه ضحكتك

ضحكة ملاك  .. 

لكن فاشوش كل الوشوش 

لبست رتوش قناع هلاك  .. 

أو قلب فيه من رقتك 

نسمة هواك  ..

ولاقلب يشبه رقتك 

ولانسمتك مرت هناك  ..

لقيت محال وميت محال

حروفي تقدر توصفك  .. 

أو وش ممكن يشبهك  .. 

وش الطيابة راح معاك .. 

ألف رحمة ونور ياخال 

وحشتني وعز السؤال  .. 

وحشتني  .. وحشتني 

وواحشني فيك قلب الملاك  .. 

وحشتني  .. وحشتني 

وواحشني فيك قلب الملاك  ..                   ~~~~~~~~~~~~~

بقلمي الفلاح الفصيح 

معوض حلمي 

منشأة بطاش 

تمي الأمديد 

دقهلية