مدرسة الحسينية الثانوية بنات Husseiniya Secondary School For Girls

Designed by / Mr.Hassan Metwally

بسم الله الرحمن الرحيم

أهلا بكم

اليوم نستكمل موضوع اقرأ وكأنك معي  شرح جزء من الفصل الأول

 

عمرك شوفت حد في الدنيا بينتج أو بيصنع أو بيعمل أي حاجه من الهوا

في حاجه في الدنيا ملهاش أصل ملهاش مصدر

طبعا لأ

طيب احنا هنتكلم عن الحضارة الإسلامية يعني هنتكلم عن المستوى الحضاري اللي وصل ليه المسلمين

ينفع نقول أن الحضارة الإسلامية جت من فراغ ملهاش أصل صحينا من النوم لقينا عند المسلمين حضارة طبعا لأ

 

عشان نفهم الحضارة الإسلامية كويس لازم نعرف أصلها أيه وجبناها منين

يبقى موضوع الفصل الأول في التاريخ هو

 

أصول الحضارة الإسلامية

 

ها ........... فهمنا العنوان

على فكره فهم عنوان الموضوع بيساعد على حفظه

أصول الحضارة الإسلامية نوعان

أصول عربية ( يعني البلاد العربية اللي كان فيها حضارة والمسلمين نقلوا منها )

أصول غير عربية ( يعني الفرس والروم وطبعا هما مش عرب بس كان عندهم حضارة عظيمة نقلها واستفاد منها العرب )

 

أولا : الأصول العربية

 

حضارات بلاد اليمن :

 

أ/ مملكة معين :

من الاسم واضح أنها مملكة ظهرت في اليمن وكان فيها حضارة استفاد منها المسلمين يبقى هنعتبرها من أصول الحضارة الإسلامية (ده بعد أذنكم طبعا)

ظهرت سنة 1300 قبل الميلاد وعاشت معين 650 سنة تبقى انهارت 650 قبل الميلاد مسألة حسابية بسيطة صح .....

مكانها فين في اليمن

سهله جدا احفظ معايا

معين تقع في الجوف

معين مكانها في الجوف

معين موجوده في الجوف

ها

اتحفظت

معين فين يا بنات

معين في الجوف

طيب فين منطقة الجوف ديه

الجوف في جنوب شرق صنعاء

جميل جدا

تبقى معين تقع في منطقة الجوف جنوب شرق صنعاء

ليها عاصمه ......... طبعا يعني مملكه من غير عاصمة ........... طيب العاصمة بتاعتها ايه ............ قرناو .... مين .... قرناو اسم حلو مش كده

قرناو

نظام الحكم فيها (يعني بتتحكم بطريقة) ملكي وراثي .... طبعا شيء بديهي انت بتقولي مملكة معين يبقى الحكم فيها لازم يكون ملكي

مش محتاجة عبقرية

اقتصادها اعتمد على التجارة الخارجية وانتهت لما سبأ استولت عليها

ايه الأخبار

صعبه  .............. ولا سهله ........

تحب نسهلها أكثر

بص

أي مملكة عربية هنتكلم عنها نظام الحكم فيها ملكي وراثي وبتشتغل أساسي في التجارة

يبقى وأنا مغمض ملكي وراثي – تجارة – مع أي مملكة

 

ب/ مملكة سبأ :

( سبأ بن يشجب بن يعرب بن قحطان بن سام بن نوح )

ظهرت عام 950 قبل الميلاد وانتهت عام 115 قبل الميلاد

جميل ... مكانها فين

احفظ معايا

الركن .......... الركن ........... الركن .............. حفظت الركن ........ جنوب غرب اليمن

يبقى تقع في منطقة الركن جنوب غرب اليمن عاصمتها ` مأرب نظام حكمها ملكيا وراثيا تعاقب عليها  اكثر من 30  ملك أشهرهم [ بلقيس ] التي ورد ذكرها في القرآن ` اعتمد اقتصادها على خصوبة الأرض  / التجارة العالمية

` اشهر مظاهرها الحضارية سد مأرب   650 -630 ق.م  , وقد انهار بسبب سيل العرم مما أدى إلى  انهيار سبأ اقتصاديا وضعفها عسكريا فاستطاعت دولة حمير الاستيلاء عليها 115 ق. م

 

ج/ مملكة حمير :

ظهرت عام 115 قبل الميلاد واستمرت حتى 525 ميلاديا يعني أول ظهور للمسيحية كان عهد ملوك حمير

تقع في منطقة قتبان (بين سبأ والبحر الأحمر) عاصمتها ريدان (ظفار)

طبعا حكمها ملكي وراثي وكان ملوكها شايفين نفسهم شويه بيدخلوا حروب كثيرة يعني علاقتهم بجيرانهم مش ولابد عكس سبأ

اعتمد اقتصادها على التجارة الخارجية وخصوبة الأرض

سر سقوط حمير رغم انها دولة قوية ؟

لان ملك حمير - يوسف ذو النواس عذب مسيحي نجران واحرقهم في الأخدود لهذا تدخل الإمبراطور البيزنطي [ جستينيان ] لحمايتهم بصفته راعى المسيحين

وأصدر جستنيان أوامره إلى النجاشي ملك الحبشة  بغزو اليمن حتى سقطت في يده عام 525 م وفى عام 571 (سنة ميلاد رسول الله ) حاول ابرهه الحبشي هدم الكعبة ولكنة فشل فيما عرف بعام الفيل ثم استولى  الفرس على اليمن حتى اعتنق بازان // آخر ملوكهم الإسلام وانضمت اليمن للدولة الإسلامية  ( طيب لو مدخلش بازان الأسلام كان هيحصل ايه )

 

شكرا للجميع - نستكمل فيما بعد

mrhassanmetwaly

لسنا الوحيدون ..... لكننا الأفضل

  • Currently 0/5 Stars.
  • 1 2 3 4 5
0 تصويتات / 328 مشاهدة
نشرت فى 19 يناير 2013 بواسطة mrhassanmetwaly

مدرسة الحسينية الثانوية بنات

mrhassanmetwaly
موقع تعليمى تربوى متكامل تشرف عليه وحدة التدريب والجودة بمدرسة الحسينية الثانوية بنات ويهدف إلى خلق جيل واع يأخذ بتكنولوجيا العصر وآليات العولمة مع التمسك بالقيم الدينية السمحة وتقبل الآخر فى إطار المواطنة والممارسات الديموقراطية والمشاركة الإجتماعية . »

ابحث

تسجيل الدخول

عدد زيارات الموقع

405,202