مجلة عشـــاق الشعـــر الإلكترونية (ممدوح حنفي)
أربـــــع تـــكــبــيـــــــــر ا ت
$$$$$$$$$$$$
عمتم ظلاماً يا سادة
يا اللى زرعتو الهم براح
وصلبتو الحب ف لياليها
على صدر السكك المدبوحة
وعملتو مشانق لحطانها
وبنيتو سراب
رحتم تزرعو فى الأرض البور
عمتم خراباً ..يا سادة
ناركم .. ما تجمع أغراب
ولا حتى احباب
مالهاش عباد
وعباية الجوخ
ما تغطى الجبل العريان
كلب وصاحبه
لاتنين واقفين
صوتهم عالى
ينبحو على بعض
لا دة سامع دة
ولا دة فاهم دة بينبح ليه ؟
وسؤال بيدور على نفسه
جوة إجابة
هو الدم ينبت أبداً
فوق لاغصان ؟
وان زهر أو طلع ثمرة
هتكون لون مين ؟
لون ... كله خيانة وبلادة
ويا سادة
كل الشعرا
تايهين بيدورو على معنى
لكلمة ........ثورة
فى الكتب الأزلية على الرف
وورقها الاصفر .. ومكمكم
مل لقوش غير تيه وسراب
وبواقى خراب
بتقطع فى حروف الكلمة
ونرقع فى الأمل الضايع
على كل رصيف
لمينا كلمات .. طعمها سادة
تخوين ...فزاعة ...تخويف
عمتم خيانة ...يا سادة
قطعوا فيها
أكلوا جتتها لخنازيركم
فصلوا من أكفانها ملابس
تنفع للعيد
أوفارول ....جلباب
سروال ....أو كاب
واختارو اللى يناسب موتها
العيد ..بكرة
هنعيد إمتى يا رجالة ؟
فى عمر مكرم ؟
ولا ف زينهم؟
دول عايزينها
مش عايزينهم
دول أفاكة ..ودول ظالمينهم
وخلاص فى حياتنا بقت عادة
نتناطح ..زى تيوس الحرب
ونعلق دمها مرجيحة
فوق عقدة صلبان العذرا
أو ع المنبر
ونقيم قداس
وتدق جميع الأجراس
ويجينا الصوت من ع المنبر
أقم الصلاة
صلاة الجنازة ....
أربع تكبيرات
............
بــقــلـــــــم ا لـــشــــــا عــــــــــر
أ بــــــو عــــمــــــــــا ر ا لــــمــــصــــــــــــر ى
ساحة النقاش