مجلة عشـــاق الشعـــر الإلكترونية (ممدوح حنفي)
محمود ناصر
مغرور على ايه على ايه مغرور
ايه يعنى الشعر طويل هفهاف
وسلاسل نازله على الاكتاف
وبياض الوش كما البنور
مغرور على ايه على ايه مغرور
-------------------
ايه يعنى عيونك كالغزﻻن
والرمش كحيل يجرح ما يبان
والنظره تخلى الدنيا تدور
مغرور على ايه على ايه مغرور
--------------------
ايه يعنى الورد على خدودك
وغصن البان يشبه عودك
وجبينك طالع منه النور
مغرور على ايه على ايه مغرور
---------------------
ايه يعنى الحنه ف كف ايديك
ولونها يبان ف كعوب رجليك
لو مره تخطى الكل يغور
مغرور على ايه على ايه مغرور
----------------------
ايه يعنى الهمسه كاﻻلحان
واللمسه ترياق للتعبان
والبسمه بتفتح طاقه نور
مغرور على ايه على ايه مغرور
-----------------------
ايه يعنى الشمس تملى تغير
والبدر يسافر بالمشاوير
لما تهل علينا بالنور
مغرور على ايه على ايه مغرور
----------------------
انا لو منك اعيش مغرور
انا اغير اسمى يكون مغرور
واسم الاب كمان مغرور
واكون مغرور ابن المغرور
---------------------------
محمود ناصر
ساحة النقاش