شهادة:
أشهد إنى
أنا الواقف
على أعتاب القرن الحادى والعشرين:
إنى ( ع ) أنام
وركبى مغروسة ( ف )الطين
وإن عينيه أكلها الدّمس
وكعاب رجليه مشققين
وإن سنانى
الصفرا الكارهانى
ع تقعد
وتقوم
وتحلم أنها تتمشى
توصل حدا بقال عايلتنا
تشترى لأمى العيانة بالحمى الشوكية
برشامة خضرا
ولو أمكن واحدة نوفالجين
وأنى (ع) أوصف ف الغربة
لحمامى الراجع (م) الغربة
و (ع) أقوله طوّل فى حبالك
دا البيت مشتاق حفنة غلة
وبقاله سنين فارد أيده للسموات !!!!!
دنيا
الأرض لمّا إرتوت
بدم جدّى
إتشكّلت فخّار ..
الأرض لمّا إتشرّبت
بدم أبويا
طرحت نار..
الأرض لمّا إتشبّعت بينا
طرحت عفونة ومذلة وعار!!!!
قالت لنا الأرض
قالت لنا الأرض
إنها ما عادتشى شرف
ولا عرض
ولا عادت بنت عم الشمش
ولا عادت عشيقة الفجر
ولاعادت زعفران الحصاد
ولا عادت (ع) تلاعب النخيل
قدام عينين البدر
ولا عادت ندى نازل من الجنة
ولاسكر
ولاجمار
ولاحنة
ولا حتى ريحة صابون جمعة
يدّى وشنا لمعة
ويشيل من الزور مرار القرض
قالت لنا الأرض:
إنها باخت
وإنها شاخت
وإن دقنها إبيضّت
وعيونها ابيضّت
وخدودها كرمشت
وجبالها إتهدّت
وجار عليها الزمن
ومشى عليها النمل
وكأنه جيش وعامل عرض
قالت لنا الأرض
إنها سلمت الضهرللحيطان
وإن العطش
مص الدم من اللسان
وإن الطنين معارك فى الودان
وإن الركبة
ع تصرخ من النار
والعجز
والصللان
ومن كتر الهم فوق الضّهر
عجزت عن إنها تأدّى سنة من السنة
واستحال عليها تأدّى الفرض
قالت لنا الأرض
إنها كرهت وش السقيع
كرهت نهار الصهد
ريحة البرد
ماعادتشى الحضن الدافى ل أيها فاس
ولاعادت الأيد اللى هاتفتح المتراس
ولا عادت الأم
اللى هاتفرد كفها وتلم
وتملا قلب المدى غلة
تروى الشفايف شهد
قالت لنا الأرض
إنها سلمت ضهرها للحصى
يمكن
لعل
وعسى
يمكن يفوق الكل
أوحتى يفوق البعض
سباطة بلح رماها الريح
عفّن شرابك
وإتهرت رجلك
لا كسيت الروح بدبلان الدّفا
ولا برد قلبك !!!
ماشى داير فى الشوارع
ساعة نازل
ألف طالع!!
عصفور بضايع
وضايع فى دوامة هوا
يتكسر جناحينه سوا
( ف) يلزق ريشه فوق وش العماير
يفضل دمه حامى
وفاير
يتخبط فجأة على كف الأرض
كأنه سباطة بلح رماها الريح
فى عز الشتا والبرد
تشفط منه دماته
وتملا خدوده بطين الهم
( ف ) يعفن شرابك
وتتهرى رجلك
أشوف قلبك الراهب
(ع ) يمد أيده
ويترجا فراشة وردية
( ع ) يهبش نسمة معدية
( ع) يصاحب قطرة ندى
تبيت معاه فى الليل
وتسيبه كل صبحية
وتسيبه يحلم بطيف الفارس الخيال
تلاقى المسافة بينهم
كد اللى بين محارة فى قلب الترعة
وبين لمبة عمود كهربا فوق سن الجبل
تصبر نفسك بمية احتمال
تتسند على عصاية الوهم
وتسمّى
وتبتدى تانى فى الترحال
ف يعفن شرابك
تتهرى رجلك
تخبى سقيع الشتا ف قلبك
وتدارى ف الكحة
وتهش من جوه الودان الصهد
ترش النسسيم رملة فى الطرقة
تتملى سماك زرقة
وكبدك يتملى حرقة
ووشك يتملى عرقة
ف يا أما
تمشى طريق الصبر بالسنتى
يا أما تعلم قلبك السرقة؟!!!
عفــن
سمايا دود
أرضى دود
بطنى فسحاية مالها حدود
صدرى الطيب بقى كولة
أيدى اليمين بقيت شولة
سنانى ماتت فى بعضيها
مناخيرى مخاطها عاميها
عفونتى عملت قىء للنهر
ف ليه ما يجيش نسر ياكلنى؟
وليه ما يجيش كلب
أوغراب
أو صقر؟!
القربيص
القربيص النّابت فى أرضنا
وأرض الجيران !!
القربيص
الطّالع فجأة يغيّر وش الأرض
كأنه شيطان !!
القربيص
الماصص دم الفول
ودم القطن
ودم الإنسان!!
القربيص
السّارق من منجاية جدى السكر
وخلّى وش عيال الأرض
مخطوف وأصفر
القربيص
اللى كل ما نحرته
نعزقه
نقلعه
نحرقه
ع يطلع تانى
كمان وكمان وكمان
كأنه شيطان!!!
رطوبة
لسه الرطوبة فى البيت
وفى الشجر
وفى التراب !!
لسه الندى ف جلدى
ورعشة البرد الهزهازة فى قلبى!!
مع إن فجرى
كان شقشق
وكان طالع ..
لسه الرطوبة
كلب نايم فى الشوارع !!!!
مش هاتنازل عن أرضى
وحياة أبويا
والمصحف
والشيخ سالمان..
والعود إذا حضن الكمان
والندى لوسال نسايم صيف على بطنى
مش هاتنازل عن أرضى !!
هى قيراط يا دوب
لكن جنتى
وكونى
فيها عضم جدى
وأبويا
ومن لونها كان لونى
ومن نداها أرتويت
ومن سكونها أهتديت
حصدت ما خليت
عطيتها ما أستنيت
ويوم ما أنا بكيت
طليت فى دمعتى ولقيت
فراشة هفهافة ع الغيطان
وعرفت أنها كمان
سرتكوينى
وإن التوراة والإنجيل واتلمصحف
ع يقولوا دى حقى
ف مش هاتنازل عن أرضى
دى سنطة زرعها أبويا
ودى نخلة
ودى مانجة
ودى طيور فى السما
متكادة لكن صابرة
ودا طين وفيه عرقى
ودى شجرة لمون
ورقها من ورقى
ودى شجرة صفصافنا المرّة
حللوا دمنا مرة
لقيوه ع يقولك :
إنه حتة من كبدى
ف مش هاتنازل عن أرضى
حطوا رصاصة فى عينى
سيبوا دانة فى مخى
شدوا كبدى من جنبى
اسحبوا روحى من قلبى
أقلعوا صبرى
من ضافر أيدى
ومن جلدى
أربطونى فى ديل خيلكم السعران
واطلقوه يجرى فى كل مكان
يجرجرنى
ويملا الفضا أحزان
يشوى جلدى فوق حصاوى الصهد
ينزل دمى يروى الأرض
ويهل فجرنا بدرى
مش هاتنازل عن أرضى
غيوم سوده
غيوم سوده
سواد كيعان العبد!!
زفرة زفارة كسحة فى ديل الكلب!!
غيوم سودة (ع ) تترقّّص فى السما
و ( ع ) تخفس بالشمس سابع أرض
( ع ) تكسى وش القمر بسقيع
وصديد
وبرد !!
(ع) تطلّع النجوم رحلة
(ف) يا كلاب دايرة
ويا كلاب غدارة
ومصاحبه
الغيم أهوه
جبل على عزبة
ف عوعوا
وعضعضوا
واربشوا
وخربشوا
وساعة ما تتعبوا
ما تزعلوش (م) الغيم
و(م) السقيع والمطر والضيم
ومن فيران فى شطين عرقكم سارحين
وف قطن الروح (ع) ينقززوا
ف عوعوا !!!!!!!!!!!!!!!!!
صبر
من جنازة ل .. جنازة
من كرمشة برة
لكرمشة جوه !!
ف يا قلبى
يا قلب الفراشة
منين راح تجيب قوة
تستحمل أحزانك
وأحزان البشر
وتستحمل دموع برة
وتستحمل نيران جوه ؟؟!!
المقدّر
من أول غيط الدّرة
شافت عينى الشروق
من أخر خيط الدّرة
لمحت عينى الغروب
تقدر تقولى يا أيوب:
عملت أيه غيرالمقدر؟
وعملت أيه
غير اللى على عضم الجبين
مكتوب؟!
حيرة
أنا وأنت
عصفورين محمّلين بالحزن
من سالف الأزمان ..
(ف) أزاى هاتقدر تنام؟
إذا كان ريشنا (ع) يتنتف
وإذا كان القلب (ع) يتشطف
وإذا كانت الأرض
اللى (ع) تطرح حب
ملوها يا عصفور سباخ؟!!
نغم
يا عصفور
(ع ) يغنّى من كتر الألم
ليش الوتر
إن ما إنضربشى
ما يدّيش نغم؟!!
وش من الصومال
أنا كل ما أحاول
أنسى همومى
وأغمّى عيونى عن هم الناس
ألقى مذيع التليفزيون
يقسم قلبى بفاس
يحشيه بوشوش لعيال من كينيا
وأثيوبيا
وغزة
والصومال..
أالقى قلبى الناشف كالصوان
دلدل عنقه ومال ..
وفتح لى خشمه من الدهشة
لما شاف فى مرايته المشروخة الوحشة
صورة وشه الممصوص
ووش أخواته
وعماته
ووش الخال ..
وش يفكر بالموت
وكأنه لسه جاى بترابه
من الصومال !!!!
أرفع رجلى ف وش العالم
ساعة
ما (ع) يحضنى النادى الأهلى
(ع) أسند ضهرى
على عربية جيب شيروكى
وبنت ملوكى
وأقعد أتسلى بالتفاح
أشعر أنى خلاص هارتاح
( ف ) ألقى قلول الفقرا البيضا
فى أنياب البهوات السودة
( ع ) تخرخر دم على صدورهم
وتغيّر كده شكل المرايات
فى اللحظة دى بالذات
ألقى الروح (ع) تحنّ لمتر حصير
ولسما بشكير
ولنص رغيف أمى الناشف
فى حنوكنا الكالحة
ولمية زيرنا العكرة المالحة
ولنومة
أحط دراعى
تحت دماغى
وأرفع رجلى ف وش العالم
وأطلّع كل لسانى للكوابيس
وأنااااااااااااااااااااااااااااااااااااااام
تحدّى
ياللى منتظرينى أموت
سكوت
سكوت ..
دا أنا ( ع ) أندفن ساعة الحياة
وهحيا جد
أول ما أموت !!
استعباد
من كام سنة
وأنت ( ع ) تبيّت فى عشّى؟!
من كام سنة
وأنت ( ع ) تلّون فى وشّى؟!
من كام سنة
وأنت لىّ عزرائيل
( ف ) يا إمّا تقتلنى
يا إمّا تمشى؟!!!
حفلة سمر
نخلاية طالعة ( ع ) السّما
شوكها ( ع ) يشك القمر!!
نخلاية طالعة ( ع ) السما
جريدها يخنق فى البشر!!
نخلاية طالعة ( ع ) السما
سباطها سايق فى الشجر
وفى الحقيقة
وفى العمى..
هزّتها ريح مش ظالمة
عملوا العيال على قلبها
حفلة سمر!!
زرعتنا الخضرة
يا زرعتنا الخضرة
ليه كل ما أجيلك م الغربة
ألقاكى تطوّحى فى الطرحة
وتبوسى الأيد
يرقص قمحك وعيدانك
ضلة شجرك .. رمّانك
يغنّى على قلب النخل جريد
يدندن فوق راسنا القمرى
لشارب م السما خمرة
يا زرعتنا الخضرة:
يارهبة:
يا ضليلة:
يا حضرة:
ليه كل ما أجيلك م الغربة
ألقاكى فاتحالى أحضانك
ومنزّله على خدّك دمعة؟!
شبابيك الفجر
البنت اللى (ع) تفتح
طاقة نور على عشّى
البنت اللى (ع ) تفتح
شبابيك الفجر (ف) وشّى
البنت اللى (ع) تطلع
تقيد بخدودها شمعة للسموات
مش عارفه
إنها هاتقابل
هزّاتى وزلزلتى ورعشى !!!!
خوف
ساعة ما بوستك
ساعة ما بوستينى
الخوف كان وحش
( ع ) ينهّش مصارينى
وكان لى ريقك نيل
وزبدة وسلسبيل
وكانت شفايفك شهد
أيش حال لمّا نبوس فى بعض
بس من غير خوف ؟!
أحزان
دخلت قلبك
ما لقيتشى ليّ مكان!!
دخلت روحك
مالقيتشى لىّ مكان!!
دخلتى فيّ
( ف ) ألتقيتينى
نيبة وجع
ونيبة كمان أحزان!!!
قيامة
وقفت الساعة
إتلخبط قصاد عينى ضرايا
لا عرفت أنا فين؟
ولا منين بدء الحكاية؟!
كانت النهاية فى البداية
والبداية برق نور
ورعشة كهربا
ودشدشة بنوّر
وشعر ( ع ) يطقطق حواليا
تقولشى شجر ( ع ) يستسلم للسكوت
ف أرجوكم ما تقولوش لىّ :
الحبيب ( ع ) يموت ...
طعم الحياة
يا نومنا
ماتصحّى يومنا
وتزرع ف العيون
أفيون الإنتباة !!
ويا موتنا
يا شاهد سكوتنا
أرجوك تحسسنا
بطعم الحياة !!!
يا طير يا أبيضانى
يا طير يا أبيضانى
يا لوزة قطن إفرنجى
عديّت سقف السموات
وقعدت طاووس على قلبى
ونسيت يا أبيضانى
إن أخوك الاسمرانى
عنده كوليرا
وملاريا
وبلاوى تتقل ف لسانى
وساعة ما هاتروى لى حزن
هاتحاوط قلبك أحزانى
يا
طير
يا أبيضانى !!!
سيد الأحزان
قرصة الجوع فى المصارين
علّمتنا رياضة اليوجا
خلّت إيدينا معوجة
لاتهش
ولاتنش
ولاتطرد
من فوق خد لوزة قطننا الدودة
ولامن وشنا الدبان
ولامن عرقنا الناحل
شعرايات للضعف
والرهقان
قرصة الجوع فى المصارين
علّمتنا نسلّم القلب للأحزان
والجسد للطين
نبقا كيمان سردين
اللحم ليف دايب
والعينين مفتحين
ومبحلقين
ومشعلقين فى السما
مستنين نزولك مطر
أوهلالك بدق
ياسيد الأحزان
ياعود الخيزران
يانخل شايل السما
فوق صوابع اليد
يا لاصق ضهرك بأرض
سايب عينيك للنجوم
ولغيوم
ولسحب أكفان
سايب عصايتك
تشتكى الغربة لدوايتك
وسايب دقنك الطاهرة عشة للفيران
عبايتك الخضرا
ياسيد القدرة
طايرة تجيب ضلة
ومسك
وزعفران
سايب الغيطان للجراد
زى قطرقاسى سايق فى العناد
سايبنا فراخى حمام لنار الرعب
ولدواير شتانا الصعب
نرضع رجلة
تعصرنا عصيرة
تخبزنا خبيزة
تهرسنا رحاية الصبر
تسكرنا مية عفن رجليهم الزفرة
(ف) نستسلم زى الكلاب لمية رعشة
ولدواير نار
ياسيفنا الحادد البتار
ياللى السنين خدتك
ورحت ما سألتش
(ف) يا هلترى بعت
ولاّ سبحتك خرطت
وقعدت تلملم الغلة
تلضمها تانى (ف) خيط
حبست نفسك فى بيت
وسبتنا بيض حمام
تلعب بينا الغربان
يا سيد الاحزان
هوانا مليان غش
وصدرنا زى العيانين بالربو
(ع) ينفخ كتير
ويفش
وزى الدود ما (ع) ياكل المش
أكلنا صوابعنا
وداخلين كمان (ع) القلب
(ف) حس إننا فى الزمان الصعب
وتعال
ياسيد الأحزان
أنتهى الملف ويبقى الشكرموصول
للصحفى المتميز/ حسن عبدالموجود
وللأستاذ الأديب الكبير/ جمال الغيطانى
