(( عشقك )))
----------*** ------------
عشقك ...
عشقك إنتحار
ومنافي وحدود وأسوار
دخلت المداين عشقتك
إتفردت بينا المسافة
جايز مكان
جايز حيطان
ويمكن تكون غيمة عنيدة
عشقك ...
عشقك حزين
وأيام بتاكل في السنين
براحنا صار أضيق من براح المدى
واللي انتهى واللي ابتدى
كان زمان
ولسه بنحلم باللي كان
في أخر الطريق عصفور وحيد
بس الجديد ..
إنه حزين
عشقك ...
عشقك مرار
هزايم وانكسار
مابين شفايفك إتنفيت
وانتهيت ..
زي الخريف زي السكات
وبين عيونك إنتهيت
واتخنقت في اللي راح واللي فات
طعم الوجع مالح ممرر
وألف أمل جوًايا متكسر
وانتي زي مانتي بتعرفيني ..
على أول الخطوة بانكسر
ضيًق حيً الهوى
واسعة شوارع الخيانة
وانا كنت دايماً باعشقك
في براحنا أو ضيق مدانا
مصلوبة الذكريات عالمفترق
متسددة كل الطرق
ولا باوصلك ولا توصليني
ولا باعرفك ولا تعرفيني
وانا زي مانتي يتعرفيني
بأه إنتي إنتي اللي اعرفك
مش مصدق عيوني
بأه إنتي اللي كنت باشتريكي
في لحظة واحدة بتبيعيني
خاينة الأيام ولاً انتي ولاً زماني
مش عارف أبكي عليكي ولاً على إيه تاني
كل اللي كان انتهى
وانا قلبي لسه ماشتهى
غير إنه يقدر يحلمك
عطًب قلبك وبار
ولاً ده لون الأسرار
النور بيعاند في ملامحك
وعيونك حواليها الأسرار
صعب اننا نقدر نرجع
واللي أصعب إننا نبكي ماضينا
وباكدًبك وتكدًبيني
وانا زي مانتي بتعرفيني
قلبك كان حضني وبيتي
وعلى كفك كان مرسى شفايفي
ما قدرتش اصدق غير لما مشيتي
وأكدًتي ساعتها كل مخاوفي
وعرفت انك بعتيني كسير
وكسرتي عمري معاكي ومشاويري
وانا زي مانتي بتعرفيني
عمري ماقدرت اغيًر مصيري