والدة الدكتور البرادعى

تحدثت والدة الدكتور محمد البرادعى، عن طفولته وكيف كان متفوقا منذ صغرة، وأضافت:" أنا كتير قلتله بلاش تدخل فى السياسة، لأنها وجع دماغ، لكنه مسمعش الكلام، ومبارك مكنش عايزه، وكان سايب الناس بتوعه يهاجموه فى كل مكان، وقالهم اتصرفوا مع البرادعى وكانوا مراقبين التليفون وهجموا فى كل الصحف القومية وكانت حمله شرسه وكلها افتراء وهذا ما كان يغضبنا

وأضافت فى حوار مسجل معه البرنامج "مصر تنتخب" مساء اليوم الخميس، حيث كان البرادعى ضيفاً داخل الاستدويو:" أنا كنت خايفة عليه جدا، ولما حصل على جائزة نوبل، لم يرسلوا مصورين اوصحفى أو مذيع مصرى، والدكتور محمد عايز يصلح البلد..هو مش عايز رئاسة ولا غيره، إنما عايز البلد دى تبقى فى مقدمة الدول".

وفور انتهاء مداخلة والدته، بكى الدكتور محمد البرادعى، وقال:"  دى أمى..واختى وانا اعيش ببركتها وهى اللى علمتنى كل حاجة حلوة".

وقال البرادعى إنه لو فاز برئاسة مصر، سيقوم بعمل مؤتمر صحفى فى إحدى المناطق العشوائية وهى اسطبل عنتر لأنه زارها ، حتى يقول للجميع" أنا استلمت البلد بالطريقة دى..ومش هقول أنا هاعمل البحر طحينة".

وحين سأله مذيع البرنامج مجدى الجلاد عن الرسالة التى يوجهها إلى المشير حسين طنطاوى رئيس المجلس الأعلى للقوات المسلحة، قال:" ياريت المجلس العسكرى يسمع للمدنيين، علشان فى الآخر نضرب تعظيم سلام للمشير والجيش والمجلس الأعلى للقوات المسلحة".

وحول الرسالة الذى يود توجيهها للواء محمد يوسف وزير الداخلية، قال:" أنا معرفهوش..لكن الداخلية عايزة تنكسر، وتنهدم، علشان لازم تتبنى من جديد".