التحرير والتاريخ – ياترى فيه علاقة؟-3-الإجابة تونس
نسأل نفسنا كام سؤال كده:
هو مين اللى مستفيد من إن انتخابات مجلسى الشعب والشورى دى تبقى فى معادها؟
وليه؟
- وهو مجلس الشعب المتنخب ده (اللى اغلبه متوقع إنه يكون من فلول الحزب المنحل) هيعمل فعلا لصالح البلد ولصالح الشعب؟
- هو فعلا هيعبر عن طموحات الشعب وحقق مطالب الثورة ويجيب حق الشهدا؟
- هو فعلا المجلس ده هيقدر يعمل دستور جديد يحقق يكون فيه الكل خاضعين للقانون؟ ولا لأ؟
- مين مصلحته إنه يعمل انتخابات شعب وشورى، وبعدها (لو عملوا يعنى دستور جديد) يتحل مجلسى الشعب والشورى دول، وتتعمل انتخابات رئاسية، وبعدين انتخابات شعب وشورى من أول وجديد؟
- وبعدين إيه درو مجلس الشورى أصلا فى الليلة دى؟ وإيه لزمته؟ هيا مصاريف ع الفاضى؟
- واللى بيقولوا انتخابات رئاسية أولا، طب هو مين أصلا اللى بيشتغل عند مين؟ الشعب بيشتغل عند الرئيس ولا الرئيس هو اللى بيشتغل عند الشعب؟ وإزاى تتعمل انتخابات رئاسة من غير ما يبقى فيه دستورالشعب يوافق عليه، يتحدد فيه شكل الدولة وتتحدد فيه مهام الرئيس المنتخب ده
وإللى بيقولك إن الانتخابات الجاية دى زيها زى انتخابات المجلس التأسيسى فى تونس، ده يا إما مش عارف مهمة المجلس التأسيسى فى تونس إيه، يا إما عاوز يتوهك
لإن ببساطة المجلس التأسيسى فى تونس ده مهمته الأساسية هى وضع دستور جديد للجمهورية التانية فى تونس
الشعب هو اللى انتخبه، والشعب هو اللى حدد اتجاهاته، مش حد تانى، فاهمنى يا معلم؟
طب لو حد قالى إن مهمة مجلسى الشعب والشورى دى فى مصر هى تشكيل لجنة تأسيسة لوضع الدستور الجديد
هرد عليه وقوله طب مانعمل انتخابات لجنة تأسيسية مباشرة، ولا هى ودنك منين يا حجا؟ ومصاريف ووقت يضيع ع الفاضى؟
زى ما ضاعت التسع شهور اللى فاتت فى مماطلة المحاكمات للمتهمين فى قتل الثوار، ده غير عدم محاكمة الناس اللى اتسببوا فى الفساد السياسى والإدارى فى مصر، لأ وكمان فيه منهم اللى نازل الانتخابات
وطبعا مش هنتكلم عن فلوس الشعب اللى متهربة بره واللى لحد النهارده مش عارفين إذا كانت هترجع ولا لأ بعد كل المماطلات السياسية اللى بتحصل دى؟
لأ والنكتة إن حسين سالم اتحكم عليه بالتنازل عن 27 مليون يورو (36 مليون دولار) علشان تورطه فى غسيل أموال، وعلشان القضية تتحفظ طبقا لقوانين الاتحاد الأوروبى؟ والفلوس دى من دم الشعب المصرى؟ إيه السرعة دى فى الاجراءات؟ الحكم ده كان فى يوليو 2011 فى أسبانيا مش فى مصر اللى قامت فيها ثورة ضد الفساد؟ ده غير الكفالة اللى دفعها هو وعيلته من اسبوعين لخزانة وزارة العدل الأسبانية، واللى كانت 13 مليون يورو؟
صحيح إن فيه الحكم عليه هنا فى مصر – فى 12 أكتوبر 2011- بالحبس 7 سنين وغرامة 4 مليارات دولار، بس ياترى هى الغرامة دى دخلت خزانة الدولة المصرية؟
ماعلينا يرجع مرجوعنا لموضوعنا
لما خرجنا وطالبنا بالدستور أولا، خرج علينا ناس وقالوا لأ، الاستفتاء أولا علشان استقرار البلد
طيب، اتعمل الاستفتاء، وبعدين ركنوه على جنب وقالك: لأ هنعمل إعلان دستورى
قولنا وماله، أصلهم لقوا نفسهم فى خانة اليك
عملوا إعلان دستورى من 63 مادة حاكمة، هو فيه كده، إعلان دستور 63 مادة؟
ماااااااااشى
بس ده طلع كده تقريبا دستور حاكم يبدى كل الصلاحيات للعسكرى، ففى المادة 56 من الإعلان الدستورى للمجلس الأعلى للقوات المسلحة جميع صلاحيات رئيس الدولة من إقرار السياسة العامة وإصدار القوانين والاعتراض عليها، لأ وكمان له حق التشريع، ... إلخ
طيب هما قالوا إن مجلس الشعب ده علشان يشكل لجنة منه ومن مجلس الشورى لوضع دستور، وبعدين انتخابات رئاسية وكده
طب ليه فى المادة 34 من الإعلان الدستورى بيحدد مدة مجلس الشعب ده بـ (خمس سنوات ميلادية من تاريخ أول اجتماع له )؟
هما هيقدوا 5 سنين يحطوا الدستور؟
فى الاستفتاء وقعوا بينا بمسألة المادة التانية من الدستور، ودلوقتى بيوقعوا ما بينا بمسألة إننا مش عايزين الانتخابات تحصل، طب تحصل بناء على إيه، وإيه إللى إحنا هنستفيدوا
إحنا الشعب مش النخبة ولامؤخذة السياسية، هما والمجلس اللى هيستفيدوا من تطويل المدة، مش إحنا
وبكرر هنا إحنا الشعب لا نخبة ولا مجلس
ياترى المرة دى هنفهم السيناريو وهنرجع للـ 18 يوم الأولنيين لما كلنا كنا بنقول الشعب يريد اسقاط النظام ، اسقاطه كله، مش بس رؤوسه، وكنا بنتكلم فى مجلس رئاسى مدنى ودستور مدنى
آه صحيح، نسيت أسأل:
هو مين أصلا إللى عين المجلس الأعلى للقوات المسلحة لإدارة شوؤن البلاد؟
وهو مبن إللى كان بيدعوا أصلا للإستفتاء على التعديلات الدستورية؟
واحدة من الشعب
باحثة تاريخ معاصر
ــــــــــــــــــــــــــــــ
المصدر
الإعلان الدستورى الصادر فى 13 من فبراير
