- د.محمد مرسي أصبح لايرى بعينه اليسرى ، وعنده مشكله في السمع ....
- اتزحلق في الزنزانه وفضل ينده عليهم عشان حد يغيثه محدش عبره !
- اصيب بجرح والدكتور قاله لازم تتخيط 5 غرز والنتيجه انهم سايبينه بالجرح اللي بقاله اكتر من سنه لم يلتئم وهم عارفين جرح مريض السكر ممكن يؤدي لغرغرينه والقدم السكري و ممكن يتسبب في البتر !
- قدموله اكل مره فشاورله واحد من الامن انه لحمه كلاب فمأكلوش !
- انخفض السكر عنده ووقع في الارض فضل ينادي عليهم محدش عبره ودخل في غيبوبه ....
- راجل عنده اكتر من 60 سنه نايم عالارض وجاله مشاكل في ظهره ، بيقول انه قاعد في زنزانه ليها 6 ابواب عشان لو جراله حاجه محدش يسمعه !
- لو ودوله اكل بيمنعو عنه علاج الانسولين ولو ودوله العلاج بيمنعو عنه الاكل ، وكل اكله معلبات على حسابه الخاص ده لو دخلوهاله اصلا وده بيؤدي احيانا اما ارتفاع شديد في السكر او انخفاض شديد في السكر !
- بيقول انا مبنمش بالليل عشان بخاف ادخل في غيبوبه نوم محدش يحس بيا !
- بيقول ان بيتقفل عليه الزنزانه يوم الجمعه 36 ساعه ، والايام العاديه بال 26 ساعه محدش يشوفه ولا يعبره !
- بيقول مانعين عني المصحف ونسوا اني حافظه بقالي 30 سنه كل الحكايه ان كنت عايزه المسه بايدي !
اتفقت او اختلفت معاه كن انسان ،د.مرسي ده انسان لازم تتعاطفو معاه ده معتقل زيه زي اي حد بل بيتم قتله بالبطيء وبيتم التعنت معاه ، اكتبو عنه ،وصلو صوته ، فين منظمات حقوق الانسان ، فين النشطاء السياسيين فين وفين !
على لسان ( احمد مرسي ابنه) .
متنسوش تدعو لماهينور المصري ربنا يجبر بخاطرهم وتخرج الجلسه الجايه !
متنسوش تدعو للمعتقله جهاد طه ابنها يرجعلها وتاخد براءه في جلسه اعاده المحاكمه ، ادعو لكل البنات
رساله المعتقل احمد ابراهيم :
ازيكم عاملين ايه ؟! انا الحمد لله كويس ، يارب تكونو بخير ، بكتبلكم النهارده بعد 204 يوم حبس احتياطي ، جلسه تجديدي هتبقى يوم الاربعاء 13-12 ادعولي ، ادعو ربنا يهون علينا برد الزنزانه ، عاوزكم كمان تدعو لبابا هيعمل عمليه في ظهره الاسبوع الجاي يارب يخف ويبقى احسن !
احنا النهارده فرحانين اوي عشان زميلنا محمد اشرف ف الزنزانه اخد براءه ربنا يخرجه بالسلامه وميرجعش المكان ده تاني ))
انتم خلو بالكم على نفسكم ، بشكر كل الناس اللي بتبعتلي جوابات واللي بيكلمو امي واختي عشان يطمنو عليا !
(سجن برج العرب زنزانه 4)
41 يوم ياسميه ، دوروا عليا متسيبونيش ، متسيبونيش انا لوحدي ، سلميلي على بابا كان نفسي اشوفه ، سلميلى على حسام ملحقتش افرح !
آه من تلك الكلمات التي مازالت تتردد في الاذان ، من فتاة في الخامسه والعشرين من عمرها لطالما عانت كثيرا في زيارات السجون بين أبيها و خطيبها ، حتى أتت لحظة الفرح بخروج خطيبها ، ثم زادت بعقد قرانها ...
ولكن بعد عده ايام قليله من عقد القران وهي نائمه في غرفتها فجرا ، تجد أمامها رجالا بل سأقول ذئاب بشريه ، استيقظت مفزوعه من نومها ، فقالو ( احنا أمن دوله ) ، ماذا يعني أمن دوله ، أهذا يعطي لكم الحكم ان تقتحمو غرفه فتاه بدون مراعاه لاي حقوق ، أهذا يعطي لكم الحق أن تأخذو فتاه ظلما وعدوانا ؟!
كنتم تأخذونها ونظرات الضعف والقهر والخوف تشع من عينيها ، ألم يكن فيكم رجلا ، ألم تأخذكم رأفه بحال هذه الفتاه ، أي نوع أنتم ؟!
والدتها وقفت تتوسل إليكم ان تتركو قره عينيها ، وقفت والقلب ينخلع ألما ، والعين تذرف دمعا ، فلم ترحموها واعتقلتموها مع سميه ثم اخليتم سبيلها واخفيتم سميه !
الى الان لانعرف شيئا عن سميه ، لم يرها أحد !
نحن نطالب كل المنظمات الحقوقيه والانسانيه التضامن معنا والمطالبه بأبسط الحقوق ظهور سميه ، نطالب منكم التضامن مع تلك الفتاه ، الا تتخلو عنها ، فهي في ظل نظام لايخشى شيئا ، لايفرق بين فتاه ولا شيخا ولا شابا ، نظام فاسد طاغي ظالم !
#سميه_ماهر_فين
المعتقله ماهينور قالت لاختها في الزياره :
الحبسة المرة دي خلتني أدرك حاجة و أفكر فيها إننا في عز ما إحنا حاسين اننا مهزومين وضعفاء، كل أفعال النظام بتأكد قد ايه احنا لسه أقوياء ، رغم إن النظام قفل كل منافذ التعبير وضيق مساحات الحريات علينا، إلا ان أبسط صور تعبيرنا السلمي عن تمسكنا بحريتنا وثورتنا ومبادئها لسه قادرة ترعب النظام....
محامي ، باحث ، ناشط حقوقي لسى قادرين يرعبوا النظام بكل سطوته الحالية و يخليهم يبذلوا كل ما عندهم عشان يلفقوا لنا القضايا ويتخيلوا انهم كده بيمحوا كل أثر للثورة ، لكن الحقيقة اني متأكدة و شايفة ان الثورة اللي دفع تمنها ملايين لسه في قلب كل واحد وقادرة تعافر وتهددهم وترعبهم بالشكل ده.
خليكوا مؤمنين بالثورة وبقوتكم ونحّوا الخلافات الفرعية جانباً عشان ما نتفتتش ومانضعفش ، إحنا لسه أقوياء رغم كل شيء."
ماهينور 3 مره يتم اعتقالها ، ادعولها تخرج ، يارب ماهينور يارب 
😞 !
#متضامنه_مع_ماهينور_المصري
عمر الدالى في 3 اعدادي اتقبض عليه الفجر من بيت اخته وخدوا زوج اخته وابو زوج اخته وخرجوهم وعمر لسه محدش يعرف عنه حاجة !
عمر كل اما يفكر يشوف مستقبله يتقبض عليه وميعرفش يمتحن ويعيد السنة ومستقبله هيضيع ، خرجوا عمر يشوف مستقبله !
#عمر_الدالى_فين
عارفه الحسيني ربنا رزقني بيه بعد 13 سنه تخيلي ، بقالي سنه ونص لا اعلم عنه اي شيء !
طيب تخيلي انه عامل عملية ترقيع في الحجاب الحاجز بسبب نزيف الدم اللي كان بينزفه من فمه !
الحسيني طالب ثانويه عامه واعتقل مرتين قبل كده وهو عنده 15 و 16 سنه !
انا بدعيله ربنا لو كان مريضا فاشفه وان كان جائعا فاطعمه وان كان عاريا فاكسه !
ده اللي قالتهولي والده الحسيني جلال اللي مختفي قسريا بقاله سنه ونص وهي قلبها بيتقطع على ابنها اللي متعرفش عنه حاجه ، امه نفسها تطمن عليه ، امه مش عارفه عايش ولالا !
#الحسيني_جلال_فين
ننشر أحدث إحصائية للإنتهاكات ضد المرأة المصرية من 3 يوليو 2013 حتى يوم 25 نوفمبر 2017 :
1- عدد النساء رهن الإعتقال حاليا ( 35)
2-عدد النساء المخلى سبيلهن ( 2465)
3- عدد النساء المختفيات قسريا حتی الآن ( 6)
4- عدد السيدات اللاتي تعرضن للإختفاء القسري ثم ظهرن بعد ذلك ( 148)
5- عدد المعتقلات اللاتي تعرضن لإهمال طبي (13 )
منهن 3 مازلن قيد الاعتقال يتعرضن لإهمال طبي يهدد حياتهن
6- عدد السيدات والفتيات اللاتي سبق وصدر بحقهن حكم بالإعدام ( 5) ، ( 2 ) منهن مازال حكم الإعدام قائم بحقهما، غيابيا...
7-عدد القتيلات من السيدات بالرصاص الحي أو الخرطوش ( 133)..
8- عدد القتيلات من السيدات نتيجة الإهمال الطبي أو حوادث غير مباشرة مثل حوادث الطرق أمام السجون (176)
9- عدد السيدات اللاتي تعرضن لإنتهاكات عامة "احتجاز تعسفي، اعتداء اثناء زيارة المعتقل، الخ" (356)
10- عدد السيدات اللاتي تم تحويلهن للمحاكمات العسكرية حضوريا وغيابيا ( 23)
11- عدد الفتيات اللاتي تم فصلهن من الجامعات ( 526)
12- مجموع البنات المحكوم عليهن حضوريا وغيابيا ( 304)
13- إجمالي مجموع سنوات الأحكام ( 1274 سنة و3شهور)
14- مجموع الكفالات والغرامات التي تم دفعها للمعتقلات ( 2,855,100)
15- عدد السيدات والفتيات اللاتي أدرج أسمائهن على قوائم الإرهاب ( 93)
16-عدد السيدات والفتيات اللاتي صدر قرار بمصادرة أموالهن ( 93)
17- عدد السيدات والفتيات اللاتي صدر قرار بمنعهن من السفر ( 106)
#البنات_لازم_تخرج
اللي حصل امس في مسجد الروضه من احد الناجين :
دخلنا المسجد لصلاه الجمعه وبدا الخطيب وقال فكره الخطبه عن مولد الرسول عليه الصلاة والسلام وبعدها سمعنا ضرب نار شديد بصراحه ارتبكنا ، شويه ودخلو علينا المسجد ضرب نار كل همهم محدش يخرج منها حي يخلصو على كل الموجود !
الناس بقت تجري اللي وقع عالتاني واللي مش لاقي ابنه انا كان معايا ولادي الاتنين مكنتش لاقيهم ومش عارف جرالهم ايه ، ببص لقيت نفسي بين اتنين اللي على يمين اتضرب واللي على شمالي اتضرب واللي قدامي اتضرب والدم نزل على وشي وبقى كلي دمي ، وهنا اخدت اول طلقه في فخدي وشويه واخدت التانيه تحت ركبتي !
وفضلنا على كده لمده نص ساعه والناس بتقع قدامنا وبعدين سكتو شويه واحنا سامعين انفجارات ومش عارفين ده ايه وصوت طلق ناري شديد ، شويه ودخلو المسجد التاني غالبا بيطمنو ان مفيش حد لسى حي !
حسبي الله ونعم الوكيل
سميه وهي بيتم اعتقالها قالت لوالدتها "متسيبونيش" ، والله مايكون لنا ان نخذلك ابدا ياسميه !
سميه ماهر التي أكملت اليوم 39 يوم لا يعرف احد عنها شيء ولا يعرف اين هي !
#سميه_ماهر_فين
