خاص/جيل يناير
حاسة ان قضية اهانة القضاء منسية للاسف رغم ان فيها حكم مش سهل خالص (3 سنين)، يمكن لانها محطوطة مع حكم انتقامي كارثي (مؤبد) ويمكن لان اللي اصدرها ناجي شحاته بسبب حوار عادي جدا مفيهوش اي تجاوز فالناس متطمنة بشكل ما انه حكم سهل والبراءة فيه مضمونة .. بس للاسف حقيقي الحكم مش سهل ومش مضمون في ظل النظرية السائدة بتاعت ان القضاه بياخدوها بشكل شخصي ولا يمكن هينقضوا حكم اهانة قضاء!
كل اللي بتمناه من ربنا حقيقي في القضيتين ان القضاه يحكموا بالورق والموقف القانوني بس ويستكشفوا الحقايق .. مش طالبة من ربنا اكتر من كده .
محمد ناجي شحاته احال 5 من المحامين عن احمد للنيابة بتهم مختلفة في جلسات ممتالية كان اخرهم استاذ خالد علي وبسبب ده هيئة الدفاع خدت قرار بعدم الترافع امام ناجي شحاته واعتبرت ده تنكيل وارهاب ونقابة المحامين خدت قرار بحظر الترافع امامه واحالة اي محامي يخالف القرار لمجلس تاديب.
بناء عليه احمد والمحامين اتفقوا ان احمد هيقول كلمة مختصرة للمحكمة يشرح فيها موقف المحامين وليه هو رافض المحاكمة وكان نص الحوار:
- انا لا اثق بعدالة المحاكمة واطالبها بالتنحي عن نظر القضية واتاحة الفرصة لدائرة اخرى للفصل فيها .. حضرتك وصفت قبل كده هنا على المنصة ثورة يناير ب (25 خساير) و6 ابريل ب(6 ابليس) وكمان في سبب تاني بس قبل ما اقوله لازم اسال حضرتك الاول لو من حقي.
- انت هنا عشان تتسال ومينفعش توجهلي اسئلة، ولا اقولك اسال .
- حضرتك فعلا عندك حساب على فيس بوك .
- وبتسال ليه .
- لانه نسب لحضرتك حساب على فيس بوك عليه تصريحات باني وزمايلي خونة وعملاء ولو صح امتلاكك ليه فعلا فده معناه اني على خصومة صريحة مع حضرتك.
-الفيس بوك ده بتاعك انت وامثالك.
- الفيس بوك مش حاجة وحشة على فكرة ده ساعدنا نسقط رئيسين مجرمين.
- خد بالك انت بتغلط انت بتوجهلي اهانة .
- انا بقول لحضرتك انه ساعدنا نسقط رئيسين مجرمين ، موجهتش لحضرتك اي اهانة.
وهنا حكم عليه ناجي شحاته ب 3 سنين سجن و10 الاف جنيه غرامة بتهمة اهانة القضاء وقال بعدها على قناة المحور ان احمد قصده بكلمة مجرمين وانه حاول يتفادي الحكم عليه لكن احمد اهانه اهانة شخصية.
للاسف هو في الجلسات الاخيرة كان بيمنع الكاميرات من الدخول فمكنش في غير كاميرا التليفزيون المصري.
