كتب/هانى توفيق
فاجأ مواطن، الإعلامي وائل الإبراشي بهجوم عنيف على عبد الفتاح السيسي، بسبب الأزمات التي تضرب مصر، والتي كان آخرها أزمة التموين.
وحمل المواطن هشام، من الإسكندرية - في مداخلته الهاتفية مع الإعلامي "وائل الإبراشي"، في برنامج "العاشرة مساء"- "السيسي" مسؤولية كل الأحوال المتردية في البلاد، ليُقطع الخط بعدها.
وأضاف المواطن: "إنت كل يوم قاعد سهران بليل بتعالج مشاكل، مشكلة خبز، سياحة، دولار، تعليم، صحة، ومواصلات.. واضح إن فيه حالة عدم كفاءة في المسؤولين اللي بيديروا الأمور في البلد.. إحنا لا عندنا وزراء ولا مجلس نواب.. إحنا عندنا رئيس.. إحنا كل مشاكلنا متعلقة دايمًا بالراس الكبيرة.. مش ممكن أنا ألاقي بلد مشاكلها كل يوم بتتكرر.. إحنا هنفضل لحد إمتى نعاني من هذه المشاكل نتيجة عدم الكفاءة؟".
وتابع: "البرلمان من يوم ما جه لحد النهارده، أنا مشوفتوش عمل حاجة، وعايز يوقف أنور السادات أو يحبس الصحفيين مع أنه المفروض منبر الحريات والدستور بيقول كدا.. الدستور دا مش هيحترم في يوم من الأيام؟".
وتابع: "الريس اللي إحنا انتخبناه وقال مصر هتبقى أحسن .. أنا بقول له المشاكل دي هتتحل إزاي؟، دي عدم كفاءة ولازم يبقى فيه حل.. أنا مش هحمل وزير حاجة.. أنا كل ما بسمع البرامج بليل بلاقي بيتقال خطوات الرئيس سريعة والناس مش لاحقاه .. أنا شايف إن دا كلام عايز مراجعة.. الناس النهارده في الشارع كنت شايف المظاهرات الناس كلها محملة الريس المسؤولية لأنها متعرفش أسماء الوزراء".
وقاطعه الإبراشي، قائلًا: "لا ما هو أصل الحكومة مهمتها الأساسية هي الأمور الاقتصادية والمعيشية.. والرئيس مهامه أكبر.. يعني تحقق الكثير زي حماية الدولة وإقامة دولة المؤسسات، وأيضًا المشاريع الكبرى.. وأنا مش هقول إن أداء وزير الزراعة أو وزير التموين الرئيس هيكون مسؤول عنه يعني ووزير التموين اتخذ هذه الخطوة - تقليل العيش - من عندياته .. لم يرجع فيها لأحد.. ممكن يكون رجع لرئيس الحكومة.. سامعني؟".. لكن المتصل لم يرد"
