بحيرة مريوط

فى حدوتة مصرية

<!--

<!--<!--

مين فاكر الخــــــبر ده كان بيجى ازاى ؟؟

افكركم

  • الصرف الصحى على بحيرة مريوط

  • او بحيرة مريوط تعانى من الصرف الصحى
  • بحيرة مريوط تنتظر رصاصة الرحمة

  • أو بحيرة مريوط تحتضر
  • او اسماك مريوط غير صالحة للاستهلاك الآدمى بسبب الصرف الصحى
  • العناويين كانت بالشكل ده

وما كانش حد بيتكلم عن تلوث مياه البحر ولا شواطىء اسكندرية الجميلة

وكان الكلام عن اسكندرية بأنها عروس البحــــر المتوســط

 

♥  السر فى الموضوع

ان بتوع الصرف كانوا بيرموا الصرف الصحى وحتى الصناعى مباشرة فى بحيرة مريوط

وكانوا بيستخدموا مياه  بحيرة مريوط  فى تخفيف الحمل العضوى اللى موجود بمياه الصرف الصحى بتعت اسكندرية قبل وصولها للبحر

وكانت بحيرة مريوط تعتبر بمثابة حوض ترسيب كبير للحمأة وكل المتعلقات الصلبة اللى جاية مع مياه الصرف الصحى

وكانت المياه بتاعت الصرف الصحى بيتم رفعها الى البحر مخلوطة تقريباً بعشرة أضعافها من مياه الصرف الزراعى والناس كانت بتفتكر انه بيتم معالجة مياه الصرف الصحى لكن الواقع غير ذلك

كل مافى الموضوع انهم بخلطوها مع مياه الصرف الزراعى  ولا من شاف ولا من درى

  • أوم ايه !!!

المهندسين العفاريت بتوع الثنمية والمشروعات فى الثروة السمكية عاملين مشروع كان اسمه مشروع الحد من التلوث داخل بحيرة مريوط

بس لما اشتغلوا فى المشروع شافوا الويل  آه والله

بتوع البيئة دوقونا المرار

والمحافظة عملت عمايل سودا

وكله كوم وبتوع البنك الدولى كوم تانى

تقول لى ايه اللى دخل البنك الدولى اقول لك اسأل بتوع البيئة والمحليات

لكن اتفتحت طاقة القدر لبتوع الثروة السمكية  وعرفوا من أين تؤكل الكتف

بدأ المشروع بحاجة اسمها انشاء مصرف محيط بالحوض الرئيسى

الاسم ده هتلاقيه مستخدم كتير ( مصرف محيط)

بتوع البيئة كانوا عارفين ان الموضوع هيجى على دماغهم

وبتوع الصرف الصحى كانوا حاطين اديهم فى مياه باردة

بس كان هناك اصرار على تعظيم الفائدة من المشروع

 بتوع الثروة السمكية عملوا ريشة بسيطة عرضها كان أقل من متر فى اقصى شرق  بحيرة مريوط فى الحوض الرئيسى

بدأوا من فوق لتحت

يعنى بدأوا من الشمال للجنوب

محدش كان واخد باله ايه اللى بيحصل

 

الريشة بلغ طولها 7.5 كم

الريشة بدأت تقرب من مصب اشهر مصر للصرف الصحى فى اسكندرية (مصرف القلعة - 1.5 مليون م3/ يوم)

رقم مخيف كان بيصب فى بحيرة مريوط يومياً

هذه الكمية من مياه الصرف الصحى كانت لها اثار سلبية خطيرة

  • فتسببت فى انخفاض نسبة الأكسجين الذائب فى مياه البحيرة

  • وتسببت فى زيادة نشاط البكتريا اللاهوائية على حساب البكتريا الهوائية

  •  وطبعاً تسببت فى زيادة نسبة كبريتيد الهيدروجين السام
  • تسببت فى ارتفاع نسبة الأمونيا
  • وطبعأ زيادة رهيبة فى النموات النباتية  وأهمها البوص وورد النيل على حساب المسطح المائى المتاح للصيد الحر
  • كمان تسببت فى زيادة نسبة العناصر الثقيلة

♥  أووم  ايه

♦  اوووم  السمك بدأ يموت

وكتير من الأنواع المحترمة اختفت من البحيرة زى اسماك البورى والتعابين واللوت

 وحتى البلطى بدأ حجمه يقل وبدأ الانتاج يقل

وزادات هجرة الصيادين لمهنة الصيد الشريفة  الى مهن أخرى بعضهــا غير قانونى

فاكرين فيلم العار على فكرة الفيلم ده تم تمثله فى بحيرة مريوط

يعنى كانت نموذجاً مثالياً لتصبير المخدرات واختباء الخارجين عن القانون

وظهرت مواضيع الهجرة غير الشرعية لبعض الصيادين الى الجنوب الأوربة

وبدأ الصيادين يموتوا فى عرض البحر

مشروع الحد من التلوث نجح والحمد لله

بس بتوع الثروة السمكية طمعوا وقالوا ليه مايبقاش المشروع اسمه منع التلوث عن البحيرة

بالفعل تم زيادة عرض الريشة وأصبحت تشكل جسر فى بعض القطاعات

ماكانش هاممنا اى حاجة

المهم عندنا عزل التلوث

  • ناس من اللى شغلتهم ع المدفع  بولولوم  قالوا المياه بتاعت الصرف الصحى هترُد للخلف اذا اتخنقت

ماهمناش لأننا مهندسين مش بتوع بواجير

كنا عارفين ان فرق المنسوب بين مياه الصرف الصحى ومياه البحيرة ماشى بالسلب لصالح سريان المياه من الجنوب الى الشمال رغم ارتفاع منسوب القاع فى بعض القطاعات

وده موضوع محبناش نتناقش فيه مع حد غير الحبايب أوى (اللى فاهمين يعنى ايه فرق مناسيب مياه)

نجح مشروع عزل الصرف الصحى عن الحوض الرئيسى

  • طمعنا وقولنا نكمل فى اتجاه الشمال فى الجزء الباقى من البحيرة (حوض المتراس)

الحوض ده كان من أكثر الأحواض تلوثاً

بنفس الفكر وبالنفس الطوييييل تم استكمال المشروع كتى وصلنا بالصرف الصحى الى  مَصْ محطة طلمبات المكس

بتوع الصرف بيقولوا كده (مَصْ) من مَصَّ يمُصُّ مَصَّـاً

♥   أووم ايه

محطة طلمبات المكس تاخد الميه بتاعت الصرف الصحى وترميهـــا فين ؟؟؟؟

♥  فى البحــــر يا حلوين

والاسكندرية عروس البحــر المتوســط  بدأت تغتسل بمياه الصرف الصحى اللى ما بتلحقش تتخلط صح بمياه الصرف الزراعى

والعملية دى أسباها كتير مالناش فيها

♥   أووم ايه

الجماعة بتوع الجنوب الاوربى بدأوا يشموا الريحة

طبعاً الصيادين بتوعهم بيجوا يصطادوا من المياه بتاعتنا

طب ايه اللى بيجيبهم  ؟؟

دا موضوع تانى متعلق بتهريب السولار ليهم بالأسعار العالمية

هو انتم ما تعرفوش  ؟؟

ماتعرفوش ان بعض الصيادين  بتوعنا الحلوين أوى و(الوطنيين أوى) بيعبوا المراكب بتاعنا من السولار المدعم  

الناس دى بيطلعوا قاصدين باب كريم من النجمة  

مش عشان يصطادوا

لكن عشان يبيعوا السولار المدعم بالسعر العالمى للصيادين الاوربيين

طبعاً بيكسبوا بالعملة الصعبة

دولار ماشى

يوروا زى بعضه

دراهم  لمراكب الخليج قبل دخولها قناة السويس مايضرش

شوفتم الفكاكة

دول بقى يصطادوا ليه ويوجعوا دماغهم ليه ؟

 

طبعاً بعد لما البحيرة نضفت

السمك اللى جاى من مصرف غرب النوبارية على حزض الـ2000 فدان بدأ فى الانتشار بورى رجع وتعابين كمان ده غير البلطى اللى قدر يأقلم نفسه مع الظروف السودا بدأ يتكاثر

وما ننساش القراميط اللى برطعت

الصيادين من البحيرات التانية بدأوا يجوا يصطادوا من بحيرة مريوط

 

بس تقول ايه

الصيادين الحلوين بتوع المنزلة وصلوا وبتوع البرلس وصلوا

بس وصلوا وعاهم احدث طرق الصـــــــــــــــيد المخالف

تحاويط من اللى قلبك يحبهــا

والبحيرة ياولداه مساحتها مش مستحملة

احنا ننضف وهمه يزنقوا بالتحاويط والشلاشيل

آخر مشروع تطوير للبحيرة كان مشروع انشاء مسطح مائى كبير على حساب نموات البوص

المشروع نجح نجاح منقطع النظير

بس اتختم ببلاوى زرقــاء

كل واحد عايز يكوش على حتة من البحيرة

فرض نفوذ

مش عارف هو احنا ما نمشيش غير بالكورباك

لك الله يا مريوط

هاتلاقيها منين ولا منين

زمان النحليات جففت فيكى لما جابت أجلك

قرارات تخصيص لشركات البترول

قرارات تخصيص لإنشاء مدينة مزعومة اسمها مدينة مبارك للألعاب الرياضية

طبعاً اسم مبارك ده كان كلمة السر اللى بيتم بيها التجفيف

ولا مدينة اتعملت ولا رياضة اتلعبت

اتعمل مكانهم كارفور والداون تاون واكوام زبالة

دا غير التجفيف عشان الطريق الدولى

ولا عصمت ناثان بتاع انابيب الغاز خصصت المحافظة دون اى وجه حق

دا غير محاولات تجفيف حوض الـ2000 فدان

ومحاولات تجفيف حوض الـ1000 فدان

ومحولات مستميتة من البئية لاستعادة  الصرف على البحيرة

هذه البحيرات طالما عانت من جور بنى الانسان عليهـــا

تنتظر المنصفين

الناس بتوع البيئة وعدوا بمعدات جديدة للبحيرة

لطن كالعاده الكلام طعمه حلو عشان كده بنلحسوه

هم الان يتحججوا بسؤال محتاسين على اجابته

نص السؤال هتودوا فين نواتج التطهير

عايزين تصرف آمن فيهــا

قولنا احنا ممكن نحرقها مكانها

قالوا لا خطر ع البيئة

قولنا نكومها وخليها منها للى كلت دراع جوزها

قالوا خطر على جوزها

واحنا محتاسين نودى كميات البوص الرهيبة دى فين

هو بيقولك قولى

واحنا بنقول اشترى المعدات الأول

على فكرة الجنازة حارة والميت 3 معدات برمائية

سامحونى الكلام واخد شكل العامية

لكن فى الاول والاخير باحكى حدوتة مصرية

 

م. جمال حافظ

01006161518

 

 

 

 

  • Currently 0/5 Stars.
  • 1 2 3 4 5
0 تصويتات / 471 مشاهدة

ساحة النقاش

عدد زيارات الموقع

97,353