العسكري ..
...........................
ياد بصلى زين ..
وافتحلى القلب ..قبل الودنين .
فرعون ..راح فين ..؟
فين النمرود..
وجنود بتهد في أبراجها..؟
وأما فرجها ..ربك نجانا من التلمود 
عبروا الصايمين جسر الأحزان
والعسكري كان 
عبد المعبود
العسكري مش عبد المأمور
العسكري نور
وقمر سهران لجل العشاق
مع انه ليلاتي يبات مشتاق
بقليب مفطور
مش له أحباب وفؤاد حزنان 
زى العصفور.
م اهو زيينا من دم ولحم
وله احاسيس وألام وشعور.
مش اخويا واخوك وواد عمى 
ولا نغمى ..
افهمني يا واد ..
يكفى انه شهيد زنهار فى طابور
مستنى الدور.
العسكرى ياد :
العسكري واد اسمر ودراع 
توقف من فوقه اسود وسباع
العسكري نار
وحطب أشجار لكانون الدار
بيدفّى البرد .. تنام يا فقير 
من غير كستور
العسكري سور
ترباس الباب
العسكري أمنّ وشطّ وبرّ 
يجيب النصر .. ولو مُطرّ
مين غاوي يحارب وسط الدمّ
في قلب النار وفى عز الحرّ
واكتب يا تاريخ 
أرواحنا سلاح 
وسمانا براح 
والبحر هناك ..حارسه الملاح
والفاس يا وطن ماسكة الفلاح .
وافهم يا بني 
قبل متهدم حاول تبنى .
تكره تقبل 
العسكري ماضي ومستقبل
جرد العيله..وألف قبيله
هو العكاز ساعة الميله
قادر ويشيل أتقل شيله 
العسكري فُرقه وموت وشهيد
العسكري فرحة ليلة العيد
وخبر معلوم ..وغضب مكتوم
أول ما ظهر .. للدنيا بهر 
وإذا زاد الضيم 
يقلبها الخيمة يزيح الغيم 
كما طيارة يحلّ الموضوع .
العسكري واد عييّل غلبان
كما عود ريحان بالعشق رطن
ورده في أصيص خايفه القصقيص
وفداك يا وطن 
العسكري جوع صوتنا المسموع
صناديق ودموع ..في قلوبنا سكن
العسكري كود فاقد مفقود 
جندي مجاهد وأنت الشاهد 
وأنت المشهود
تتجنى عليه اوقفلك .. لا 
العسكري مات ووهبنا حياه
اثبت يا ولد ..
العسكري غول ..ببساطه ها قول 
كما طبق الفول ساندك يا بلد ..

شعر : حمدي محمد حسين