بكره المنتظر ..ما يجييش 

....................................

بين نقطتين البعد ..فى الدايره 
خاويه البطون م الفرح
والأسئله بايره 
ربع الخراب اترسم 
وبالكروكى اتقسم 
حلم القلوب
كل الشعوب ثايره
والاسئلة حايرة 
يا هل ترى بكره 
احلى من امبارح
ولا المطر مالح .
جانا الهوا جارح
يادمعتى الفايره
كتب التاريخ كلمته 
جغرافيا بالمقلوب
قطب الشمال داخل على
قطب الجنوب 
والنخل مش طارح
حتى المناخ بدلوه 
وبعد ما قتلوه
لم الطريق طوله عليه واتلف
والحزن سف الشريط كله
وقبل ما يدوب الجليد بالكيف 
ضربوا الأمم على بطنها بالكف
قطر المسافة زهق 
يا دولة الأعراب 
يا بليدة في الإعراب
والكل خايف م القدر لو فاق
زقزاق دخلنا في سكة الأنفاق
الكل دلدل لسانه والتزم في الصف 
وبركنا فى الشارع جمال محاميل 
والعدل بيميل وبيحود ..بيتهوود 
ورجعنا تانى النسور اللي بتترود
وا لفكرة تاهت فى الكتب ع الرف
يا كل شئ فى بلدنا له قيمه 
ليه كل شئ فى بلدنا صار سيما 
مين اللي كتب السيناريو 
واللي أخرج مين ؟
مين اللي دق الوتد ..؟
راح طيّر الخيمة .
وبدم بارد.. لا اتعظ ولا كف
دراويش هواكى يا حياة جينا
دراويش ومين فى الحضرة يرمينا
ماتحسى بينا 
دى الآهه جوا الآهه مكتومه
والدمعة جوا العين مردومه
ورمشها لم رف
عينى عليكي يا بلد 
والولد درويش
وكام فى هواكى مات دراويش .
يوم الحساب قرب ..فمتعديش
ومن انبعاج الصور ..ما تتخضيش 
خدى عينى منى .. يا حالفه ما تبصيش 
بلكونه فكت من حيطان البيت ورافضه تعيش
رغبة فى عينين البت محبوسه فى ضهر الشيش 
وأنا وأنت والشارع
قاعدين على القهوة بنموّت الأوقات 
نستنى بكره المنتظر مايجييش

شعر: حمدي محمد حسين