هموم مصري
****
أضربي بالجزمة فينا
دوسي عدي من فوقينا
لو في مرة بجد جعت
عايزة جبنة ما تحلبينا 
*****
تهنا ضعنا ما حد سائل
من نزيفنا الدم ســـائل
بس لحظة لو رجـــعت
تهمليش حّلي المسائل
****
اللصوص في لحمنا تأكل
تجري تلعب ع الشناكل
كل لحظة تقول شجاعتي
عيش جبان و بلاش مشاكل
****
أرحمينا ما عاد فيه باقي
و الطبيخ تاه عن طباقي
اه بنصـــــرخ هل سمعت
نفسي أنهى الآن سباقي
****
برضو دي أصول المحبة
حتى فـــــول بنـعد حــبّه
تهت منا و لينا بعــــــت
من الديون راح نستخبى
****
هم ولادك و أحنا لاء
في النعيم أحنا ف مشقة
ليه يا غالية و أيه صنعت
لما زاد في القلب حرقة
***
مستحيل هتكون دي أمي
أو في يوم بتشيل ف همي
مش قريبتي أو دي جارتي
مرة أبــويا أو مرة عمي
****
مصر فينك رحت فين
طب وعدلك صار دفين
أه يا حلوة لو رجعت
نجري و نبوس الايدين