مكالمة من

محمد علاء مبارك إلى أسرته
أزيك يا مامي ، وحشتيني قوي إنتي وبابي وأخويا الصغير وجدو وتيتة وعمو جمال وكل أصحابي

مصر كلها وحشتني ..

يامامي يوم 25 يناير أصحابي في الجنة نادولي

وقالولي " تعالي بسرعة يامحمد في ناس من بلدك دخلوا الجنة " .. قولتلهم : مصريين !

قالوا : أيوة دول شهداء كمان يامحمد 
جريت بسرعة معاهم أشوف الشهداء اللي من بلدي

وأسلم عليهم وأفتخر بيهم ،

وكل يوم بيجي شهداء تانيين

ولما كثروا قوي يا مامي وزادوا ووصلوا اكتر من 300 شهيد قلت لصحابي وأنا فرحان :

عارفين ده اكيد جدو بيقود مصر في حرب تانية علي اسرائيل أو أعداء تانيين ..
روحت يامامي وقعدت معاهم علشان يحكولي عن جدو القائد واللي بيعملة وأسمع بطولاتهم

ولما سألتهم : هي مصر بتحارب مين وأنتو استشهدتوا إزاي وفين ؟

وجدو كرمكم قبل ماتيجوا الجنة .. بصوا لبعض ومحدش رد !
سألت تاني : ردوا عليا مين قتلكوا ؟ واتقتلتوا برصاص إسرائيل ولا مين ؟ وجدو عمل إية في اللي قتلكوا ؟

ولما بكيت لأول مرة لان الجنة مافيهاش حزن ..

قالولي : لا مش اسرائيل .. دة رصاص مصري يا محمد ،

 حراس جدك يامحمد هما اللي قتلونا! 
لقتني مش فاهم حاجة ،

صرخت وقلت : مش عاوز أسمع حاجة ، وجريت ورحت قعدت لوحدي ،

لكن الشهداء جم وقالولي متبكيش

يا محمد إنت ملكش ذنب وخدوني في حضنهم وطبطبوا عليا ،

حسيت بدفا حضنك يا مامي وهما بيضموني في صدرهم ،

رفعت رأسي وقلتلهم : إنتوا طيبين قوي....

قالولي : مش إحنا بس اللي طيبين ..ده كل المصرين طيبين .
يا مامي انا مش هاسأل حصل إية ولا عاوز اسمع حاجة ،

لكن قولي لجدو أنا مش أغلي من أي واحد منهم عند أمه ،

وزي ماحسيتي يوم ما أنا مت اوصفي له كل أم حاسة بأيه دلوقت ،

وقولي له إنتي لأني أنا مخاصمه.... إزاي هان عليه كل الناس دي ومعملش حاجة للي قتلهم ؟!
قولي له لازم يبرد قلوب الامهات والابهات ..

ده الابن غالي وانتي عارفة يا مامي ويا بابي ..قولوا لجدو إنة خلاص مبقاش ينفع يبقي رئيسها بعد اللي حصل ،

جدو لازم يرتاح في بيتة ويسيب مصر لولادها هما أولي بيها وانا هادعي له ربنا يغفر له
، وقبل ما أخلص كلام يا مامي ..أهم حاجة والكلام دة لبابي وعمو جمال وجدو قبل ماتسبوها لولادها يديروها ، أوعي يكون يابابي في مالك إنت وعمو جمال وجدو حق لمصر وللمصرين وخدتة ، أوعوا يا بابي.... انا بحبكو ومقدرش اشوفكوا شايلين ذنب زي ده .. أوعوا يا بابي مال الشعب الطيب الغلبان الشقيان تاخدوه معاكوا تصرفوا وتعيشوا منة بقيت حياتكوا .
أوعي يا بابي أخويا الصغير يأكل ويعيش ويتربي بمال مش من حقة وفيه مصرين كتير مش لاقيين.
ساعتها تبقي كتبت عليا أفارق أخويا دنيا وأخرة لانة لازم يتربي بمال حلال عشان اقابلة يوم في الجنة .. وقول لجدو وتيتة وعمو جمال وطنط خديجة إن الجنة حلوة قوي ..أحلي من اي حاجة ، ولا أي مليارات مش حلال تستاهل يضحوا بالجنة عشانها ، ده ربنا بيسأل عن كل جنية كسبته إزاي وصرفتة في إيه ..
والسلام عليكم ياعيلتي اللي بحبها ..
والسلام تحية أهل الجنة