<!--<!--[if gte mso 10]> <style> /* Style Definitions */ table.MsoNormalTable {mso-style-name:"Table Normal"; mso-tstyle-rowband-size:0; mso-tstyle-colband-size:0; mso-style-noshow:yes; mso-style-parent:""; mso-padding-alt:0cm 5.4pt 0cm 5.4pt; mso-para-margin:0cm; mso-para-margin-bottom:.0001pt; mso-pagination:widow-orphan; font-size:10.0pt; font-family:"Times New Roman";} </style> <![endif]-->

خدعوا الستات لما قالولهم " أقرب طريق لقلب جوزك معدته " ثقافة غلط بتتبنى على أساسها العلاقات الزوجية فى معظم الأسر المصرية ، ما انكرش إن فيه رجالة بتموت فى الأكل بتحبه زى عينيها ، عايشين عشان ياكلوا مش بياكلوا عشان يعيشوا، بس دى مش عناه إن كل الرجالة كده ، أو إن يكون المطبخ والخضار والفاكهة وأصناف الأكل هى المعيار اللى على أساسه نتحكم فى مشاعرنا وعواطفنا الأسرية ، وإن كل ما كان أكل الست حلو جوزها يحبها أكتر ، وإنه يبقى مبرر إن كل يوم تحاول الست هانم من دول تجرب أكله جديدة سمعت عنها أو شافتها فى التليفزيون ........بس نعمل إيه فى موروثات ثقافية ورثناها جيل بعد جيل بتأكد  - ما اعرفش إزاى لكل الستات – إن كل الرجالة عقلها ومشاعرها فى بطنها .

ولإن الدرة المصنونة والجوهرة المكنونة فوزية هانم مراتى ماهياش من كوكب تانى كفى الله الشر ولأنها اتربت على نفس الثقافة الغلط رسخ فى زهنها وثبت فى عقلها الباطن – رغم تعليمها العالى – إنها عشان تقدر تحتفظ بيه أطول فترة جواز ممكنة وما تزوغش عينى عنها يمين أو شمال على أى ست تانية ، كرست كل جهودها اليومية فى إنها تتفنن فى تجهيز وتحضير أشهى وأغرب الأكلات الشرقية والغربية ، وأصبحت قنواتنا الوحيدة فى بيتنا هى قنوات الطبخ بجميع أشكالها وأنواعها مرة من المطبخ الصينى ومرة الإيطالى ويا سلام على الأكلات الهندى والسعودى واللبنانى .

وأصبحت معدتنا أنا وولادى الغلابة معمل تجارب لأى صنف يخطر على بالها تعمله طبعاً بطبق علينا سياسة الأمر الواقع " عاملالكوا أكله إنما إيه....... تجنن .....هتاكلوا صوابعكوا وراها " ولأننا كل مرة بناكل صوابعنا ورا الأكل – وطبعاً أنتوا أكيد عارفين قصدى إيه – حاولت أكتر من مرة أقنعها وأفهمها إننا زى كتير أوى من الأسر المصرية العادية بنحب الأكلات التقليدية اللى اتربينا طول عمرنا عليها مالها البامية باللحمة ولاحتى الفول والطعمية يا ناس اشتاقنا فى بيتنا للأكلات الشعبية المصرية مالنا احنا ومال الأكلات الإيطالية ولا الهندية حد كان قالها إن انا مهراجا هندى ولا كانوا أهلى الله يرحمهم عايشين قبل كده فى ميلانو ما انا طول عمرى أنا وهى متربين فى مصر وعايشين فى مصر وهنموت إن شاء الله فى مصر يبقى ليه الخايلة الكدابة لكن أقول إيه اللى فيها فيها وحسبى الله ونعم الوكيل .

لا ومش مكفيها كده وبس دى حتى بقى محور كلامها وثقافتها كلها عن الأكل يعنى مش بس مستحملين العمايل ،  لا والكلام كمان ، مش شاطرة غير فى تحضير الأكل وبس ما بتفهمش غير فيه ، تسألها فى أى حاجة تانية تقول ما اعرفش ، تسألها إيه آخر الأخبار العالمية تقولك " الطماطم بقت ولعة نار تصدق وصل تمنها سبعة جنيه ...صحيح مجنونة ، ولا الرز والمكرونة "  ، ونبقى لسة ما خلصناش فطار تسألنا هتاكلوا إيه على الغدا والعشا وبكره تحبوا أعملكوا إيه ؟ ، حلقة مابتنتهيش من اهتمامات مطبخية واختراعات  وابتكارات فوزاوية  ، حد يفهمها يا ناس إن الحياة الأسرية مش كده ، وإن الواحدة من دول عشان تحتفظ بجوزها لازم حبة مشاعر عاطفية مش لوبيا وفاصوليا وملوخية .