<!--<!--[if gte mso 10]> <style> /* Style Definitions */ table.MsoNormalTable {mso-style-name:"Table Normal"; mso-tstyle-rowband-size:0; mso-tstyle-colband-size:0; mso-style-noshow:yes; mso-style-parent:""; mso-padding-alt:0cm 5.4pt 0cm 5.4pt; mso-para-margin:0cm; mso-para-margin-bottom:.0001pt; mso-pagination:widow-orphan; font-size:10.0pt; font-family:"Times New Roman";} </style> <![endif]-->

جميل قوى إن يكون عند الواحد مننا موهبة من أى نوع رسم لوحات فنية ، نحت ، عزف موسيقى وكتابة نوتة موسيقية ، غنا وتلحين وتأليف أغانى ، كتابة شعر وزجل وقصة ورواية ، تمثيل والذى منه ، ممارسة رياضة والنبوغ فى أحد اللعبات كل دى شئ عال العال حاجة حلوة وآخر جمال ماحدش يقدر يقول على الحلو وحش .

مايمنعش إن يكون عند الواحد موهبة حتى لو كانت فى بدايتها تشغل أوقات فراغه فى حاجة مفيدة وتستغل طاقاته الابداعية ، انما تكون الموهبة دى يا حضرات فى كل وقت وعمال على بطال أهو دى اللى فوق طاقات كل البشر

وأهو دى اللى حصل من الموهبة الفاذة اللى جوه بيتنا الفنان الموهوب فى كل مجال وزمان صلاح أفندى جوزى

مش راسى على بر ، مش ثابت على حال كل يومين والتانى طالعلنا فى موهبة شكل وعلينا السمع والطاعة واللهم لا اعتراض على قضاءك يا رب .

من حوالى شهر كان قاعد بيتفرج على أحد البرامج اللى بتعرض مواهب الشباب فى الغنا  ، حلو أهو يتسلى شوية على ما الغدا يجهز ويرحمنا من قولت  " خلصتى الأكل ولا لسه "  اللى بتتقال فى النهار خمسين ألف مرة

قعد على غير عادته يتفرج باهتمام شديد وشوية شوية اندمج مع البرنامج لدرجة إنه نسى إن الأكل قدامه بقاله ربع ساعة قولت فى بالى الحمد لله بقى فيه حاجة تانية تشغله فى التليفزيون غير ماتشات الكورة اللى واجعالنا دماغنا صيف شتا وليل نهار ، وفجأة مع نهاية البرنامج اكتشف جوزى فجأة وبدون مقدمات أن عنده موهبة رائعة ورائدة فى الغنا ........ إزاى  ؟ ما أعرفش  .

حبة يقول أنا امتداد عبد الحليم حافظ يا جهلة – طبعاً الجهلة دول فى رأيه اللى هو احنا اللى مش مقدرين قيمة موهبتة الفنية – وشويتين يقول يا سلام دى صوتى ولا صوت ام كلثوم فى زمانها ، وفيروز وفايزة أحمد ونجاة وفريد كوكتيل غريب الشكل من المطربين والمطربات ويقعدنا جنب منه بالساعات نسمعه بالاكراه وطبعا ً لازم فى كل مرة نسمعه نقول يا سلام الله يا صلاح إيه الصوت اللى مالوش مثيل دى وإذا قولنا غير كده يزعل مننا ويقول " انتوا عارفين حاجة فى دنيتكوا كفاية عليكوا تبقوا فاهمين فى المسقعة والبامية " ورضينا بالموهبة الغنائية وقولنا أمرنا لله وفضلنا على الحال دى كتير ، أسبوع بالتمام والكمال  لحد ما جه فرح أخته وقام يغنى فيه بعديها جوزى اتأكد إن مالوش فى الغنا بتاتاً .

الحمد لله كانت غمة وانزاحت .

واعترف جوزى  - بعد صراع شديد مع كرامته اللى مش سامحاله يقول قدامنا انه غلطان -  بإن الغنا دى مش من ميوله وان له ناسه اللى هو مش منهم والاعتراف بالذنب فضيلة .

ويوم والتانى لقينا المحترم جوزى داخل علينا فى إيديه عود ، سألناه بتاع مين دى ؟ قالنا بكل جسارة " بتاعى أنا " دى لزوم التلحين .

يا وقعه بيضا تلحين إيه اللى بتقول عليه إلا ما عمرنا شفناك بتقرى نوتة موسيقية ولا أصلاً بتعزف عود قبل كده هو فيه إيه ؟ هو إحنا نخلص م الغنا ندخل فى التلحين ..... يا واقعة طين .

وقعدنا نقنع فيه أسبوع بحاله ودانا وجعتنا خلاص من كتر التلحين اللى بنسمعه منه ...... ارحمنا يرحمك ربنا والحمد لله بعد منهده وبعد عراك اتفركشت " السيمفونيات الصلاحية " اللى عندنا فى البيت .ومش كل مرة تسلم الجرة .

قاعدين فى أمان الله فى يوم لقيناه جاى وفى إيديه حبة ورق وأقلام قال إيه الوحى الشعرى نزل عليه دلوقتى حالاً  

واسمعوا القصيدة دى ، والبيتين دول ، وهلما جره تعبنا يا ناس من كتر الكلام اللى لا له وزن ولا معنى ، ارحمنا بقى دماغنا وجعنا وهو عامل ودن من طين وودن من عجين ،  يا بختنا يا هنانا أمال إيه عندنا أمير الشعراء فى بيتنا ، مرة مدح ومرة غزل ومرة هجاء ومرة رثاء وعلى كل لون يا بتسطا ، مايصدق يحصل موقف قدامه إلا ويكتب عنه قصيدة .

ويوم والتانى اتعودنا خلاص ع الشعر لحد مابقينا احنا كمان بنقوله معاه .

وقولنا خلاص الحمد لله أهى برضو الموهبة اللى نعرفها أحسن م اللى مانعرفهاش .

وعدى أسبوع كعادة كل موهبة يكتشفها صلاح جواه هو يا دوب أسبوع مافيش موهبة قعدت أكتر من كده ولقيناه داخل علينا بفرش وألوان أشكال وألوان اللى كبيرة واللى صغيرة ايشى ألوان مية واللى جواش واللى زيت واللى بيترسم بيها على الازاز لما خلاص قعلنا طار مننا ما ننكرش إن دى فعلاً الموهبة الحقيقية اللى عنده وإن فعلا رسوماته مبهرة وألواناته تحفة فنية مش عايزة كلام ولا جدال من إن كل اللى شافوا لوحاته قالوا حاجة فريدة بجد مش هزار بس مش لدرجة إن يبقى الرسم والألوان كل حاجة فى حياتنا وهما أساس اهتماماتنا يا ناس دى وصل الموضوع لدرجة إننا لو قولناله اشترى معاك وإنت جاى لحمة نلقيه يرسم لنا على الاطباق لحمة ، طب عاوزين خضار نلقاه قوام جاب الفرشة والألوان ويرسم لنا ملوخية وخيار ، أما بقى الفاكهة أشكال وألوان فى بيتنا ، فاكهة الصيف وفاكهة الشتا مش ملاحقين لا وإيه الطبلية مليانة من خيرات الله واحنا علينا نتفرج مش ناكل ، موهبة فنية صحيح .

أهيه دى بجد المواهب ولا بلاش موهبة تنفعنا ساعة غلو الأسعار والحاجة أم قرشين اللى بقى سعرها نار ، مش تقولولى موهبة غنائية وموسيقية وشعرية .مالها الموهبة الفنية  " رسم البورتريهات والفواكة الصيفية والشتوية " .