* رؤيه قلم *

يوم م بفكر أكون مسئول
لما بشوفكو يجينى ذهول
ناس وفطارها كان كفيار
وناس مش لاقيه طبق الفول

***************
آدى بنوته وشارطه جهاز
وآدى بنوته وفاتها جواز
نفسها مره لو تتجوز
يبقى جهازها لمبه جاز

***************
آدى غلبان محتاج لفلوس
وأدى تلميذ قضاها دروس
حد يقولى أعمل ايه
حظى معاكم ليه منحوس

**************
الغلبان محتاج لعلاج
والمبسوط محتاج لمزاج
أما عجوزنا علشان ياكل
نفسى يركب درصين عاج

****************
آدى موظف غاوى رشاوى
وأدى نصاب شَبعنا حكاوى
زى السوس وبينخر فينا
وبيطنطط زى الحاوى

****************
آه لو شعبنا حس وفاق
بطل كدب وكتر نفاق
شاف مشاكلنا بكل وضوح
من غير حتى أى زواق
****************
بكره حياتنا هتصبح عال
بس الكل يكون شغال
يالا نزود ف الانتاج
وكفايه هيصه ولعب عيال

*****************
بكره تروق والله نفوق
بس الشعب يلاقى حقوق
لما نلاقى بلدنا أمان
كلنا كده هنبص لفوق

****************

كلمات / رضا أبو الغيط

إلغاء إعجابي