(إيه الحكاية)
ياحبيبي إيه الحكاية
قوللي إيه قصدك معايا
وإنت عارف إني دايب
فيك ياروحي من صبايا
ياحبيبي إيه إللي بيك
شايفك بعيني ومش لاقيك
بتبقى جنبي ومش معايا
روحت فين وأنا روحي فيك
إيه إللي شاغلك بس عني
رد قول ياحتة مني
قوللي فينك شارد بعينك
عندك مين بس أغلى مني
دور ودوّر في المشارق
والمغارب والمفارق
مش هتلقى حد غيري
وليف ومخلص لك ياطيري
عايز تطير وتسيبني ليه
وعشنا إللي عيشنا فيه
رغم هجرك برضو لسة
ياطيري مادد لك إيديه
خايف عليك من إنكسارك
لما تبعد عن ديارك
إبقى خليك بس فاكر
إن دا كان إختيارك
والندم مافوهش فايدة
بعد نار حبي إللي قايدة
ماتنطفي بعلو سورك
أو نفورك أو غرورك
في المفاضلة والمزايدة
بقلم طارق السيد