مركب الأحزان
لاأنا من درب شكمبة
ولا أبقى أنا جني اللمبة
ولاقولتش أولالا
ولا برقص سامبا ورومبا
أنا شيئ على قد الحال
معنديش جاه ولا مال
ودنيتي سبع عليا
ونعامة مع الأندال
يحلالها تمرمط فيا
وتجيب وتحط عليا
أصرخ وبعلو الصوت
والصرخة بتشرخ فيا
أنا شايل طاجن ستي
بالغصب ومش بإرادتي
والهم أتب على ضهري
وبعيد أنا قوي عن شطي
مركب وبدون مجاديف
عودها نحيل وضعيف
وحدها وسط النوّة
يالطيف ألطف يالطيف
الموج بيلاطم فيها
م العالي يرميها واطيها
وحتى نجوم الليل
الغيمة بتخنق فيها
يامركب الأحزان
بكرة يمن المنان
بعد التوهة تلاقي
مرسى وشط أمان
بقلم طارق السيد
أعجبني
