غريق حلم........

افردي قلوع الحقيقه لألف ميل
وازرعي بذرة أمل تطرح نخيل
ساند على هموم الغلابة ف كل جيل
متروحيش يا شمسي وانتي مغمضه
متسرسبيش السر وقت الفضفضه
وان حد يوم لغبط ف سيرتك
شربة واحدة جوا نيلك مضمضة
شايل هموم جيلي وراكب موجه هزماني
والموت ف بحر غريب مكتوب ف عنواني
وف شنطتي صورة لنيلك والهرم
وقفايا طابع كف موجوع م الورم
الخضر ليه عاب السفينة وفكها
المركبة غرقت وفيها الحلم ضاع من فكها
طب فُكها وافرد ملامح خلقتك
ايه يعني لما الموت يوقّف رحلتك
مليون وليد مستني دوره ف الغرق
او يمضي عقد جديد لإحساس اتحرق
إسمه الأمل طب والعمل ؟
الكلمة دي محتاجه فتوى من الشيوخ
اوعاك تفكر في الاجابه احسن تدوخ
او أريحك اتمشى جنب الحيط كتير
واتعشي وقت الجوع حطب زي الحمير
والغي قاموس الفكر كتّر ف الشعير
اياك تفكر ف العدالة وف الرغيف
إياك تقول إنك جعان خليك نحيف
الاختيار يا صاحبي ديما بين قوسين
يا تموت بايدك وانت غرقان ف المراكب
يا تموت اسير الحسرة فرجه على المواكب
محمود 23\9\2016