مفاتيح الخير
الله الرحمن الله رحيم.
حمدا لله رب العالمين
الله مالك يوم الدين.
يهدينا صراطه نوصل سالمين
الله ينور عللي ينور ضلمة بشمعة
الله يوعد اللى بايده بيمسح دمعة
الله يسعد اللى بيسعد قلب حزين
الله يرضي اللي بيهدي الناس للدين
الله يكرم اللي فى زنقة بيكرم جاره
الله يقوي اللي فى غضبه بيطفي فى ناره
الله يحسن للي بيحسن ع الغلبان
الله يستر اللي بيكسي فى يوم بردان

الله يسلم اللي إتكلم قال الحق
الله يمن على اللى يحن وقلبه يرق
الله يداوي اللي يداوي جروح الناس
الله يساعد اللي يباعد فاس عن راس
الله ينصر اللي بينصر خير على شر
الله ينعم عللي فى يوم لشيطان مانجر
الله يرحم اللي بيرحم كل ضعيف
الله يرزق اللي يقاسم صاحبه رغيف

الله يعفي عن اللي بيعفي فى عز القدره
الله يبارك للي فى صحرا بيزرع خضرة
الله يأمن اللي يأمن ملك الغير
الله يجعل كل خطاوي رجليه فى الخير
الله يجبر خاطرجابر خاطر غيره
الله يجازيه ويذيده كمان وكمان من خيره
الله يفرج كرب مفرج كرب عبيده
الله يحفظ اللي بتمنع منكر ايده
اللي بيزرع خير بيداه
فى حساب الآخره حصاد يلقاه
واللى بيزرع شر... حواه
شجر الزقوم راح يبقى دواه
إن شوفت أخوك بيشد الحبل فى يوم.إرخيه
كان الله فى عون العبد إن كان العبد فى عون أخيه
الله الرحمن الله رحيم حمدا لله رب العالمين
الله مالك يوم الدين. يهدينا صراطه نوصل سالمين
مفاتيح الخير بتقول للغير.
ربنا واحد ومالوش غير
إن كان فى المسجد ولا كنيسة
ولا فى معبد ولا فى دير
يا كل شعوب العالم اتحدوا.
اعبدوا رب العرش لوحده
توبو وآمنوا وإعملوا صالح.
دنيا وآخرة معاكوا تتصالح
بقلم طارق السيد