المنسى
مش عاوز منك عَطا
ولا فرش ولا غَطا
عاوز كلمه حلوه
تعين ع المرمَطه
أنا المهجُور والمَنسِى
راضى بفقرى ونَحسِى
عيونى تِبات تبكى
بتصعب عليّا نفسى
مهما البرد قاسى
أرحم من غدر ناسِى
هَجرونى وعذّبونى
بيتاجروا باحساسى
البرد أهون بكتير
ولا عيب انى فقير
أنا عطشان حنان
جوعى قلة تقدير
مش طالب دوا وعلاج
ولا حتى سيجاره مزاج
بس تفهموا مره
انى لحُبكم محتاج
عاوز ضحكة وشوش
زورونى ماتخافوش
عاوز المس حنانكم
مش هِدمه وقروش
مش هالعن الزمن
والشيخوخه والوهن
هالعن أى انسان
يبيع حُبّه بِتَمن
يامعدّى هناك ياللّى
دايماً ناسينى تملّى
تعالى خد بايدى
نفسى أقوم أصلّى
