جهنم حمرا
هحكيلكوا حكاية مقندلة
في سهرة حمرا منيلة
والناس سهرانه مصهللة
شايفين رقاصة مغندرة
بتتحنجل آخر حنجلة
خطوة لقدام واتنين ورا
مع لفة بخفة مشنكلة
قولتلكم سهرة مقندلة
والبيرة بتغسل فى الكلى
قال هاتلي إزازة مشبرة
وبطاطس شيبس محمرة
وزتون وخيارة مخللة
وسيجارة بني معطرة
وعيون بتبص مسبلة
لعيون م الخمرة مدعبلة
من شم البودرة مسطرة
دي جهنم ولا دي مزبلة
دا شيطان واداكم سكرة
عيّشكوا فى دنيا مسكرة
ياناس وعقولها مخبلة
دي حلاوة السكر تذكرة
في جهنم درجة مشعللة
فهمتوا الدرس ياهل ترى
طب آدي حكمة مفسرة
فى الدنيا الضحكه مجلجلة
فى الآخرة الصرخة مولولة
لو دوقتوا الدنيا ممررة
فى الآخرة تدوقوا السكرة
بقلم طارق السيد
