منير خاطر

يا شيال الهموم
مين راح يشيل همك
همومك بقت بالكوم
فين خالك وفين عمك
صبحك بيشبه مساك
والآه بتنكتم جواك
وتنادى مهما تنادى
الخلق مش حساك
تبص ع الناس والجيران
وتقضى النهار حيران
وتسأل ماحد يجاوب
والليل يفوت سهران
وبدال مينكتم نفسك
تحكى منك لنفسك
وتمسك بإديك القلم
وتكتب حكاوى من نفسك
كلام فاضى ملهوش سعر
وحروف قرعه من غير شعر
وعك كتير ملوش لزمه
ويتهيألك إنو شعر
والدنيا مدياك ضهرها
ماتعرف مساها من صبحها
خايفه منك وللا خايف منها
مش مآمناك على سرها
تجيلها يمين تجيبلك شمال
خايفه تشيل معاك احمال
تجيلك لما تلاقيك مريش
وتهرب لو متلاقيش المال
زى الست لو متجوزها
وتجرى منك لو تعوزها
تحايلها مهما تحايلها
تلوى يوماتى ليك بوزها
البلاوى فى الهدوم ماسكين
وقلب بتقطعو السكاكين
والسكه ضلمه ملهاش آخر
والطريق واعر يا مسكين
وتقول دى سكة السلامه
تلقاها سكة الندامه
وترجع تلف من تانى
كأنك فى وسط دوامه
منير خاطر