بقلمي / محمد البنا
7 يوليو، الساعة 06:30 مساءً
بنتـــــي فاطمـــــــة
مجموعة أشعار إجتماعية باللهجة الصعيدية
الفقرة الأولى :
اسمعي يا فاطمة مني
حكمة قالها عجوز ف سني
الحياة مش بالتمني
يااااااااااه يا بنتي
خلق ياااما وناس كتييير
تلقي منهم الصغير
والأكيد منهم كبير
فكرك يا فاطمة مبسوطين ؟!!
واللا دول عايشين حياة ؟!!
لا يا فاطمة..
دولا زي طابور حمييير
عاشوا ماتوا تقولي مين
ما الودان سدوها طين
والعينين متغفلجين
لو تشوف الظلم عيني واتخرس
يبقى دولا مش عينين
لما صاحب الحق جنبي يندهس
يبقى دولا مش عينين
دول بهايم
ف السواقي مربّطين
الحياة يا بنيتي مش لبس العباية
ولا هي متولي جوزك
كيف يلفلف ف العمامة
الحياة يا بنيتي كيف تحي بكرامة
كيف تزيلي عن عيونك الغشاوة
كيف تزيحي الغمامة
كيف لسانّا يقولها لأ ..لأي باطل
مش نماطل
كيف إيدينا تبني مصنع
كيف نشغل كل عاطل
لما تبقى الست ..ست
ولما يبقى فلان ده راجل
ياااااااه يا فاطمة
لما يبقى دهوا حاصل
راح تشوفي دنيا تانية
دنيا فيها الحق سايد
مش حياتنا
اللي فيها الكل باطل !!
