سيب دقنك فى حالها يا حضرة الظابط

بقلم

أسماء الد سوقى

حاجة غريبة والله أنا عمرى ما سمعت عن طلب ( اطلاق لحية ) أنا أعرف طلب نقل , طلب احاطة , طلب اعانة غلاء معيشة.....الخ لكن أول مرة أسمع عن طلب زى ده . عموما مفيش مشاكل كل واحد حر ( أنت حر ما لم تضر ) لكن إسمحلى يا حضرة الظابط يا سيادة العميد يا سعادة اللواء يا كل الرتب طالما حضرتك بتجاهد فى سبيل تحقيق طلبك ممكن أطلب من حضرتك شوية حاجات صغيرة تجبهالى من عندكم ( لأن مينفعش أنا أطلب ) وخد بالك أكيد أكيد هيجى يوم وأحاسبك يعنى الحق مش هيضيع حتى لو اتأخر يعنى مفيش حاجة ببلاش . اسمع يا سيدى آسفة يا أفندم إسمع يا سعادة البيه ممكن تقدملنا طلب بحسن معاملة الناس داخل الأقسام واحترامهم مش أكتر والله ما عايزين مشروبات لأن دى هتبقى اساءة أدب من الشعب , وطلب كمان أصغنن ( أصغر يعنى ) من الأولانى بلاش ضرب الناس داخل الأقسام مشيها شتيمة بس يا افندم مضطرين ما هو مفيش اختيارات عندكم هنعمل ايه عشمنا فى التعديل الد ستورى والوزارى والحكومى والقضائى القادمين تزودوا الاختيارات شوية يا مسهل يارب .

كان نفسى يا حضرة الظابط بما انك تملك حرية الطلب من الوزارة فى زحمة طلبات ( اطلاق اللحى ) دى تطلب للشعب المسكين ده تصحيح حاجات كتير غلط عملت حاجز رهيب بينكم وبين الشعب عشان نرجع نقول بجد من غير نفاق الشرطة فى خدمة الشعب ومتنساش ان التصحيح ده هيتمتع بيه أولادك لما يكبروا وأحفادك لما انت تكون فى دار الحق وهما فى دار الباطل ويلاقوا ظباط يعاملوهم على انهم بشر مش حيوانات .

طب بذمتك ودينك يا سعادة البيه افرض بعد ده كله رئيسك مرضيش يخليك تربى دقنك وقالك ( آهى دقنى آهى يا ولاد الذين آمنوا ) على سبيل التهريج مع بعض لو خليت حد يربى دقنه يا سيدى معلش اتحمله ده راجل أكبر منك وفى مقام والدك طب ما احنا متحملين الجهاز كله ولا بنتكلم هااااااااااااااااااااااا دعابة يا افندم والله ده انتوا جزمكم على راسنا من فوق ونياشين على صدورنا .

من الآخر يا سعادة البيه الظابط الله يكرمك ويفتح عليك يارب من فضله وهدايته وكرمه وتترقى وتبقى فريق لو تقدر تربى حاجة كويسة فى نفوس الناس مع تربية دقنك يبقى كتر الف خيرك وان شاء الله هينوبك بدل الثواب الف وهنيالك يا فاعل الخير والثواب عند الله وسيب دقنك فى حالها يا حضرة الظابط عشان متعملناش مشاكل مع الوزارة .

وعموما يا افندم بهرج والله مع حضرتك دعابة برييييييييييئة .