فعلا شعب مفترى

بقلم

أسماء الد سوقى

أنا مش فاهمة الشعب ده عايز إيه تانى مفيش حاجة عجباه وحقيقى فعلا المسؤولين الله .... بيوتهم عملوا كل حاجة الشعب طلبها ما شاء الله فى خلال سنة من قيام الثورة أصبح الشعب يتمتع بكل أشكال الرفاهية بلطجية تلاقى وإيه بكل تصنيفاتهم سواء قاتل أو حرامى أو قاطع طريق وفى منهم بالسلاح وفى سادة حسب الرغبة ده بالإضافة إلى التنويع فى السلاح من أبيض لأسود وبجميع مستلزماته من خرطوش لرصاص حى وكنوع من الفنتازيا لإضفاء البهجة على المكان قنابل غاز وأحيانا مسيلة للدموع . ناهيك عن توفير فرص العمل وتخفيض الأسعار وشوف الرفق بالحيوان آسفة قصدى الإنسان زيادة معاشات الضمان الإجتماعى عشرين جنيه ومن خوفهم على الشعب أحسن يغرق فى الترف والملذات رجعوا فى كلامهم ولغوا زيادة المرتبات والمعاشات إيه يا ناس عايزين إيه ؟

ولا كرم أخلاقهم وتدليلهم للشعب لما حسوا إنه ( شبطان ) فى مرشحين للرئاسة ياه ياه غرقوا السوق مرشحين كل الموديلات ابتداءاً من العصر الحجرى مرورا بكل العصور حتى الحديث على أساس إنهم يرضوا جميع الأذواق فى نوع بلاستيك وده آمن وفى نوع تانى بالريموت كنترول بس طبعا الريموت معاهم طبقا لقانون حماية المستهلك وفى نوع آخر ده تحفة زينة فقط. فعلا شعب مفترى لا يستحق كل هذه النعم ويارب يارب تزول من وشه .