عرفوك ياليل
=======
 
عرفوك ياليل ...وشافو فيك القمر
ووصفوا كل جميل قالوا عليه قمر
 
يا قمر يللى بتيجى من الليل للليل
خليك معانا .... ونس معانا الليل
 
نسهر ... نقول مواويل
نسهر نقول ياليل ياعين
.......
 
د اللى معاه جرح بييجى الليل
يبات يقول ياعين هاتى ياعين
هاتى دموع الآسى
كُبى على الخدين
 
دموعه تقول موال حزين
وآهاته تمسح دموع العين
يقول ياليل قصر شويه الليل
وحتى جمال القمر
بيشوفه الاخر حزين
..........
 
واللى حب جديد وهوى
يسهر يغنى ويا الهوى
يشوف حبيبه جوه القمر
فرحان وقلبه كله امل
يبات ليله يحلم بالهنا
يحلم بساعة اللقا
...........
 
واللى انظلم من الناس
ليله يبقى كله صلاه
ينادى فيه رب الناس
يقول استرها يا الله
يشوف القمر زى العين
عين بتبكى بالدموع
ويبات الليل يقول ياليل
لحد امتى انام مظلوم
.............
والظالم يا ناس فقد الاحساس
بيخاف م القمر بيخاف م النور
جوه فراشه نايم ملفوف
لو ريش نعام بيحسه شوك
حلمه دايماً شايفه كابوس
ويشوف القمر كله عيون
عيون بتكشف ظلمه للناس
عيون معاها كشف حساب
ويبات الليل مرعوش
شايف قدامه وحوش
لا هو قادر ينام
ولا هو قادر يقوم
...........
 
عرفوك ياليل
وياما غنوا معاك مواويل
 
عرفوك ياليل
وياما قالوا ياليل ياعين
 
فيه اللى بيشوفك جميل
وفيه اللى شايفك حزين
 
فيك الصلاه فيك الدعاء
ونهايتك ... فجر جميل
 
=========
 
تحايتى ووافر احترامى
الصابر