- خلاص كده ..؟

     طب تعمل ايه وانت بتدور وحاسس إن ده أول طريق تمشيه   *  

مش معنى إن البحر قال الشط ده ماسخ 

ورمله مش على قد الهوى مايبات عليه 

يبقى انت تفضل تدوس برجليك اللى باشت من صباح ربنا 

فى مكان ما بتدوب الرمال ع الشط 

فى موجة سايلة من شفايف البحر 

متحاولش .-

*    مش يمكن أكون عابر سبيل 

وبافهم فى السفن 

أو يجوز عرفت إن السعادة متتوصفش 

بين حبيبين 

غير بانتصارهم ع العزول 

أو حتى فاعل .. 

محبش يكون مستتر 

وساعى فـــ طريقه للقمر 

لحظة ما يحمر خد البحر - من حبه - 

يتدراى فى قلب السما 

ويبعت لرمل الشط لمعانه 

فيموت على نفسه م الكسوف 

وحبة رمل .. 

بكامل التفاصيل 

حدفت نفسها فى البحر 

دابت ..

-   أنا ... 

* مش مهيأ لشم الورد غير اللى مشى فــ بستان 

المسألة مش تطفل 

اللى عاوز يعرف سر البحر 

لازم يكون له علم بلغة الصدف 

ويراقب الموجة

ازاى بتتعامل مع الشط 

بعد الناس ما تمشى 

الحكاية ...

لما الشمس بتشقشق 

الشط .. 

بيلبس رملته بسرعة 

والموج ..

بيرجع تانى لوش البحر 

يبتسم للشط 

ويفضل طول النهار يرشه بالمية .

                                                                                                ( علاء عبد السميع )