يا اللى نويت تدارى فيا

ابتدى

مشى ف تفاصيلى

وانكش فى قلبى

وانتهى لحظة ما أدوب

فيك اشتهاء ..

ومخاض

وطين .... وتراب

مخلوط بعرق البنى ادمين

آخر شقاوة ..

بتحطنى فى عنيك

مصلوب فى اخر نبضة فيك ..

وكأنى مستنى البشر

من غير عينين أو قلب او روح او جسد

وكأنى مستنى البراح

وكأنى طير من غير جناح

والدنيا بتحبلها فى اليوم ميت نبى

انا مش مؤكد أعرفك ..!

أو حتى باستناك على عتبة غنا

بتقول لى ليه ..انك واخدنى جوه أسرارك

مهيأ أبقى بير
أنا مش أمير ..

وأقل واحد فى اللى عدوا عليك

قعاد بين الحياة والموت

أقل واحد صوت ..

وانت اللى ماسك فيا بسنانك

وبتحط النقط فوق الحروف

مع إنى مش قد المقام

بتحطنى ف دايرة سكات

متغمى بيك

انا اللى عمرى ما كنت ليك

مضطر اهاود

وانت متحاوط بيأس

ومن بعيد شايف سراب

بتصر انك شفتنى

قلة على الشباك

بتضحكلك وترويك م العطش

انت الوحيد بتشفنى

انت اللى غاوى تشدنى

مع انى مش محتاج سكن

لكن يادوب شايف كلام

فى عنيك يجوز ينفع وطن ..

فياريت ..

مدام نويت ..

اتدارى فيا وخشنى ..!