حوار بينى وبين بلدى) كلمات : أحمد الحجاوي)قصيدة بعنوان

 

لانا عايز ولا بدى

ولا بيدك ولا بيدى

 

فى قلبى جرح هالقدى

بيجيب فيا وبيودى

 

لعنتى سلسفيل جدي

واقول ازمة وهتعدى

 

.طب اعمل ايه معدتشى

وظلمك لسة جواكى

بنام واصحى على صوته

 

خلاص سايبك انا وهمشى

.وعمرى فى يوم ما هنساكى

حكمتى ع قلبى انا بموته

 

دا انا فاكر فى يوم سيبتك وعارف انى هرجعلك

.سعتها قلبى من غبتك فضل يبكى ويدمعلك

 

 عشان يرجع واقوله اسمع

دى بلدى ظلمها بيوجع

لكن قلبى ولا بيسمع

 

 ولما رجعت انا ليكى لقيت الظلم مستنى

  وساكن جوا  أرا ضيكى بيسال كل يوم عني

 

 

 

 

ياريتنى سعيتها أنا ما رجعت وعشت فى بعدك اتلون

 عشان ارجع والقاكى

 ولو قالوا سافرت وبعت دا كله عليا كان اهون

ما اشوف الظلم جواكى

 

خلاص همشى ومش هرجع ولو صوتك ينادى يرن

هسد وداني مش هسمع عشان مرجعش تانى واحن

 

 لانا عايز ولا منى ولا بقصدى ولا بودى

 سيبينى وابعدى عنى وخلى المركبة تعدى

 

 لكن سامع كلام بلدى بتندهلى بعلو الصوت

وقاعدة تقولى يا ولدى فى بعدك عنى ممكن أموت

 

 هتمشى طب سايبنى لمين أنا عايزاك تكون جمبى

 سقيتك ظلم ياما سنينلكن والله مش ذنبى

 

ماأنا زيك شربت الكاس  ومنه سقيت انا ولادى  

على قلبى سنين إنداس واقول كله فدا ولادى

 

 وفى الاخر تقول همشى وفاكر ان دا عادى

وانادى عليك متسمعشى واقول ارجع ومش راضى

 

 خلاص امشى بقى وسيبنى أعيش ف ظلمى وفسادى حكمت عليا تتعبنى وأبقى صفحة فى الماضى

 

 ياريت بس تكون فاكر  عشانك ياما دوقت الويل  

وكبرتك وربيتك

حميتك وانت بتذاكر سهرت عليك فى عز الليل

عشان من قلبى حبيتك

 

 

 

 ياريت بردو بلاش تنسى انك كلت من خيرى

 واخرتها تقوم تقسى وعايز تروح بلد غيرى

 

لا بشمت فيك ولا بعايرك لكن خايفة لتنسانى

 هيفضل قلبى انا شايلك بيحلم تيجى من تانى

 

خلاص امشى وسيب بلدك  وخلى الظلم يقتلها

 هدوق الجرح من بعدك لكن ربك يعدلها

 

شوفوا يا ناس ؟؟؟

دى بلدى حزينة علشانى !!!

بايعها خلاص !!!

وبرده لسة شاريانى !!!

 

أمانة يا بلدى سامحينى

تعالى فى حضنى ضمينى

 

ياريت قلبك بلاش يدمع دموعك والله ما بتهون

قوليله إن أنا هرجع ومش همشى ومهما يكون

 

 هعيش فيكى على أرضك على الحلوة وع المرة

وهحميكى وأصون عرضك لحد ما تبقى يوم حرة

 

ومش هبعد انا عنك ... ولو قتلونى جواكى

كفاية انى اموت فيكى

اسيبك كيف دا أنا منك ؟؟؟ هكون جمبك ووياكى

بدافع عن اراضيكى

 

يابلدى يا اغلى ما عندى لكان قصدى ولا بودى

 مسير الازمة هتعدى وأقول انا مصرى مين قدى

 

لانا عايز ولا بدى ولابيدك ولا بيدى

 خلاص يا مركبة عدى أنا قاعد هنا ف بلدى