قصيدة بعنوان (قومي يا سينا) صرخة ألم وشكوى من أرض سيناء كلمات: احمد الحجاوي
لقيت سينا في يوم على جمب زعلانة قلت أما أشوف مالها قاعدة مخاصمانا
قربت منها وقلت مالك يا أرض الخير ؟؟ وين النخل والشجر وديتي وين الطير ؟؟
باين على وشك جواكي سر خطير أشكيلي وأحكيلي دا السر عندي ف بير
بصتلي بعينيها والدمع ماليها وقالتلي إن مفيش واحد بيحميها
ربت ولادها سنين خلتهم أحلى شباب كبروا وظلموها خلوها نار وخراب
قلتلها أنا أبنك وأني اللي هحميكي أرضك هتبقى عمار وبإيدي هبنيكي
زعلانة من أخويا راح أجيبه يراضيكي لازم يبوس رملك وبروحه يفديكي
يلا بقى قومي قلبي عليكي حزين دا الدمع ف عينيكي غطى الرموش والعين
قلبي بيقول ليكي الضحكة راحت وين ؟؟ أمانة ما تبكي دا أنتي بكيتي سنين
دا الضحكة دي غالية دفعنا فيها كتير وحاربنا علشانها وأخدوا أبويا أسير
مش فاكرة يوم كنتي محصورة ف استعمار؟ حرقوكي في شبابك ورموكي وسط النار
بالسلم خدناكي وفرحنا يا سينا ويومها كبرنا وفيكي صلينا
أنا عارف إن السلم حرمك من التعمير لكنه مش بطال أحسن من التدمير
حرموكي من زرعك واخدوا ايلات منك الرك ع أولادك ماهو بردو دول منك
هما اللي باعوها قال إيه بيقولوا سلام حرموكي من أرضك ودا بردو اسمه كلام ؟
قومي وأنا عارف بكل شكواكي ما أنا ياما عشت سنين ظلموني جواكي
وبردو باقيلك و ف قلبي راح أشيلك وهخلي أمي كمان بالنصر تدعيلك
قومي كفاية خلاص راح أجيب أنا حقك هزرع أراضيكي ولا يوم حتتشقق
وهجيب أنا أخواتي علشان يساعدوني هرويكي من دمي وأفديكي بعيوني
ياسينا يا بركة قومي كفاية دموع والله لأخلي صوابعي ليكي شموع
كلمات : أحمد الحجاوي
ساحة النقاش