قصيدة بعنوان ( حكاية أب ) في ثورة مصر وليبيا 

راجل يا ناس مسكين كان عنده 6 عيال     علشان  يأكلهم لازم يجيب شيال

طيب وكان اسمه بيقولوا عبد العال        علشان يربيهم كان ليل نهار شغال

تعبوه سنين كتير لكنه ما اتكلمش       والفقر نادى عليه وصاحبنا ما استسلمش

    و ف يوم خلاص فاض بيه من كتر مطالبهم             حاسس ياناس انه قاعد يعذبهم

كان نفسه لو مرة يقعد يكلمهم                               يأكل ولاده ياناس ولا يعلمهم ؟؟؟؟

غلوا عليه الأسعار والأب ما نطقشي                        ولما يوم اتهان   قام قلبه ما سكتشي

زعق بعلو الصوت وقال كفاية خلاص                      ولما صوته زاد ضربوه يا ناس برصاص

نادى على ربه وقاله عندي عيال                           عبدك أنا الغلبان  حتى اسمي عبد العال

ضحى عشان حاجة هي اللي باقياله                         علشان كرامته تعيش وكرامة عياله

طب وابنه دا المسكين مين اللي هيربيه ؟؟؟                 أهو سابه لللأيام هتجيبه وتوديه

والفقر ناويله حالف ليلعب بيه                                وزمانه لسه كمان معرفش ايه مخبيه ؟؟

عاش ياما وسط عذاب وف لحظة قتلوت ابوه              سرقوا النهار منه وف ليلة سودا سابوه

بقى هو واخواته دايقين عذاب ومرار                    هيجيبوا أكل منين ؟؟ دي عيال ولسة صغار

شافوا ياعيني الشقى وداقوا طعم الغلب                       من كتر مشاكلهم والله نطق القلب

يارب شوف ازاي ولا حد عبرهم  ؟؟؟                 انت اللي خالقهم قادر تصبرهم 

          اللهم صبر ابناء الشهداء وأهلهم  يارب العالمين 

كلمات الشاعر أحمد الحجاوي