قصيدة بعنوان ( وصية شهيد ) كلمات الشاعر : أحمد الحجاوي
والله دا واحشنا صوتك يا حرية سرقوكي من شعبك ظلمه وحرميه
ورجعتي لينا خلاص وأنا عمري ما حسيبك لو غبتي عني هروح وراكي وحجيبك
طعمك عسل ما أحلاه ساكن في دم الحر والله ما يحسه غير اللي داق المر
ضحينا علشانك بدم الف شهيد ويوم ما شوفناكي والله كان يوم عيد
خليكي ويانا وإياكي تمشي بعيد دا احنا بقينا خلاص في عصر حر جديد
والله ما نسيبك وعمرك ما حتهوني ولو حد قربلك حفديكي بعيوني
عشنا سنين وسنين شوفنا اهانة وزل نورتي بلدك مصر بلدك وبلد الكل
وتعبنا علشانك ودوقنا كاس المر ولما خدناكي شعبك خلاص بقى حر
مين اللي قال في يوم ان احنا كارهينك ؟؟؟؟ انتي اللي كنتي بعيد ولا كنا طايلينك
دلوقتي في قلوبنا وجوا في عينينا خليكي فاكرانا وإياكي تنـسينا
فرحت من قلبي في يوم ما شوفناكي لو كنتي ناسياني انا عمري ما انساكي
شعبك بيناديلك والله محتاجلك بعدتي عنه كتير و ف قلبه كان شايلك
الله على جمالك سحر عيون ملايين حيرتي في قلوبهم واستنوا فيكي سنين
ليه كنتي سايبانا في وسط نار وعذاب ؟؟؟ والله واحشانا مش وقت لوم وعتاب
حتى الكرامة كمان كانت مخاصمانا عشنا سنين في عذاب وف زل واهانة
والعدل كان مسجون في وسط زنزانة إحنا اللي طلعناه وبدم شهدانا
دا شبابنا هد السور و شعبنا كمل ما الشعب داق المر ولابد يتحمل
رسالة من سينا بقولها للتحرير مطالبنا مطالبكوا مكتوبة في التقارير
حققنا منها كتير ونقذنا شعب غريق في منامي قالي شهيد لازم تشقوا طريق
وقالي إحنا كمان ضحينا علشانكوا وهدفنا كان الظلم يبعد بعيد عنكوا
لازم تشوفوا مين هما اللي قتلونا ؟ والله لو سبتوهم يبقى انتوا خونتونا
وقبل أما يمشي قال ان اسمه بسيوني وقالي حقي معاهم هما اللي ظلموني
ضربوا عليا النار صفوا يا ناس دمي أمانة تحموا الشعب واتطمنوا أمي
أنا عند ربي شهيد وف جنته موجود عايش في خير كتير والخير ملهش حدود
وعلى بلدي وصاني وقالي أحلى كلام وقالي مصر أمانة بعديها قالي سلام
اللهم ارحم شهدائنا وصبر أهلهم على فراقهم
يارب العالمين
كلمات الشاعر : أحمد الحجاوي
شاعر جامعة سيناء
العريش
محافظة شمال سيناء
ساحة النقاش