كله كلام
كـلـه كلام والشعب إحتار عين في الجنة وعين في النار
وكـلام ياناس لسه بيتقال مـرأة وفـئات وكمان عمـال
أنا نفسي أسأل بس سؤال مين اللي هيبقى يا ناس شغال ؟
دلوقتي كله بيبقى حبيبك وبعد ما ينجح فيها يسيبك
يلا نفكر مين نديله ولو مش عاجبك يلا نشيله
صوتنا أمانة أكيد عارفين بس الصوت ده هيبقى لمين ؟؟
كله بيقول من أجل الشعب وسمعنا كلام بيخش القلب
فكرك بس كلام وخلاص ؟ ولا بجد كلام إخلاص ؟
حيرتونا كتــير وياكـو عايزين كل الشعب معاكو
ياترى هيكون الشعب أمانة ؟ ولا مجرد بس حـصــانة ؟؟؟
أنا مش عارف أرشح مين ده صوتي هيحكم غيري سينين
شوفوا كام واحد رشح نفسه ياترى علشانا ولا لنفسه ؟؟؟؟
لو علشان شعبه هندعيله ولو علشانه يبقى يا ويله
مش عايزين غير الحرية والأسعـــار تقـــل شوية
ونفضي بلدنـا من الحرمية ولحد بيوتنا تجيلنا المــية
شوفو إزاي الشعب بسيط ؟؟ مش عايز دوشة ولا تنطيط
فياريت كله يصفي القلب ويحاول يبقى في صف الشعب
نازلين تتخانقوا في انتخابات إهدوا وحاولوا تكونوا إخوات
وياريت نرشح واحد بس واحد قلبــه يا ناس بيحس
واحد فاهم حالـنا وعاقـــل مش واحد عايش ليه ولا سائل
ومن غير خناق ولا حتى مشاكل نرسـى عليه والباقي يتنازل
ساحة النقاش