سلام سلام ،
سلام سلام.
يا سلام لو كل الأيادى تتصافح،
بيض و صفر
حمر و سمر.
يا سلام لو كل القلوب
يعشش جواها الود.
و لو كل العقول تنور
و تلغى العند،
اللى عامل بينها
و بين طرق الااخرين سد.
و لو كل العيون اترفعت لفوق،
تطلب من ربنا
يملا الأرض حب
و مافيش حد يكره حد.
و لو كل الألسنة
عشقت الكلمة الطيبة،
و بقت الكلمة الطيبة
للكلمة الطيبة رد.
و لو كل الاقدام سعت فى الخير،
و خللت الخير مالوش جزر
و كله مد.
سامع واحد بيقوللى
يا عمنا قلت ستة لو،
و لو واحدة
حرف شعلقة فى الجو.
طب ايه رأيكوا نتلم كلنا
و نرفع ايدينا لفوق مع بعضنا،
نشد كل لو مششعلقة
ننزلها عندنا.
نخبيها فى قلبنا.
طب جربوا
انا واثق انها هتطرح فرح .
الشاعر العجوز
مرقص اقلاديوس
