امسك حرامى
محمد ضباشه
فيه ناس بتطلع السما
على الكتاف متشعبطة
وعقولها عاجزة وإنما
بالكوسة وحبة حليطة
يعيشوها فلة فى الهنا
وإحنا حياتنا مخريطة
علشان كده زعلان أنا
من دنيا بامية مشتشطة
ماخدنا منها حاجة لينا
ولا شوفنا فيها ظقططة
في بلدنا اللى له ضهر
لازم ... يعيش مستور
وينقى من غير مهر
ما فى أجمل بنات الحور
وأنا أبويا عاشها فى قهر
وكان فيها فقير معزور
كبيرة يعرف عمى بكر
حتة خفير على الدور
فمعقول يكون لى سعر
ولا يبان لى طاقة نور
ما بلدنا ماشية كده
بالكوسة والبامية
على هواها تقول ده
وسكة أبوه عامية
وتدوس على دا وده
ولوعلومهم فيها دايمة
وتحلف مفيش غير ده
دا فصيلة الشرف حامية
عرفتوا ليه غلبان
وعاملين عليه قيود
وفى كل سكة جبان
مانع الكرم والجود
فى البامية مالى مكان
حامضة وكلها الدود
وصحيح أنا انسان
ورب العباد موجود
يا عم افهم كلامى
لتيجى معايا تدوق
ياما باعوا كلامى
لبكرة والله تروق
والخطة جاية بأسامى
بس الجنية مخنوق
وياله امسك حرامى
وزير معاهم فوق
فخلاص اسكت يا سامى
أصل الكلام محزوق
معانى الكلمات
متشعبطة : راكبة دون تذكرة مرور
حليطة : كلام ناعم ومؤثر
مخريطة : معدومة
مشطشطة : حارة كالشطة
ظقططة : فرحة
مخنوق : غير متوفر
محزوق : عاوز يعمل حمام
