ماتشدهاش ... إلى شحات فكري .. شعر عبدالله صبري
ماتشدهاش
لو رافضة تطلع مرغمة ما تشدهاش
الدهشة مشهد مرتجل في رواية ضد الإندهاش
البحر ماسك في السمك
بتشد ليه ؟
سيب اشتياقك يرسمك
مشتاق لأيه؟ .
عود الشرف راح ينفجر
دم و ضحايا لو اشتعلْ
ما تشدهاش في زمان مخلِّي
حتي صمتك مُفتعلْ
ماتشدهاش بالكسرة لو ضم الشفايف بعترك
هدنة غيابها هتنتهي
و هتنفعك في المعترك
ما تشدهاش لسا الطريق لهناك أساسا ما ابتداش
ما تشدهاش علشان تبيّن فرحة الموت في اللي عاش
ماتشدهاش في المفتتح
دي الخاتمة مترين قماش
ماتشدش المطلق كدة
حاسب ليخبط في المُعاش
حاسب لتجرح قلب واد
سافر يجيب عالم ماجاش .
سيب كل حاجة تشد فيك
واعمل عبيط ماتشدهاش
