للعام الثاني الشعر في ضيافة (ون جلوبال)
فى أجواء احتفالية مبهجة أقامت شركة ون جلوبال المخيم الربيعي للعاملين فى الشركة وعائلاتهم. وتضمنت الفعاليات مسابقات ترفيهية وفقرات متنوعة شارك بها العديد من الموظفين وعائلاتهم، مما أكسب الفعاليات اجواء أسرية تنم عن حرص الإدارة فى الشركة على ترسيخ روابط ومفاهيم التعاون والاخاء بين الموظفين بعيدا عن أجواء العمل.
وتخللت الفقرات الاحتفالية فقرة شعرية شارك فيها الشاعر شحاتة فكري بقصائد نالت استحسان الجمهور الذي تجاوب مع الإلقاء المتميز والكلمات الشاعرة المميزة .
كف الرحمة ... شعر شحاتة فكري
كلام الدنيا لو يكفي أنا أوفيِّ
وأكتب ياما فـ أوصافك
لكنه بجد ممكفيش
فـ مهما كتبت مموفيش
هعديلك بحور الشعر والكلمة
وأدور في معانيها
ولو قلب البحـور ضالمـة
هشوف حبك دليل فيها
واجبلك من المحار معنى
لأوصافك يكون كافي
يا كف الرحمة في الزحمة
وبتطبطب على اكتافي
يا نور عيني وتكويني
يا نبع من الحنان صافي
مـ أنا شبهك وأنا منك
وأوصافك تدوب فيا
تشكل كل أوصافي
يا معنى القوة والفرحة
في وقت الضعف والأحزان
رضاك الرحمه والجنة
وعند اعتابك العنوان
وكوني في الحياه عايش
وكوني في الوجود إنسان
يجوز أغلط وأنساكي
تلاقي الجرح جاي مني
أنا اللي نشأت في حشاكي
وأنا اللي كتيييير ببكيكي
ولا اتأثرت ببكاكي
أنا البذرة اللي جمعاها
كفوف صبرك
وأنا المزروع بمعانيكي
وأنا المروي بحنان قلبك
ومتشال حلم فـ عنيكي
وأنا برضه اللي وقت الجني
طرحت الطرح مش ليكي
وطرحي كان في أرض الغير
ومطرحتش فـ أراضيكي
تناديني سنين فاتت
تخبط فوق ببان القلب
دعيتي كتير عشان أكبر
بدمعاتك وقولت يا رب
تصون ابني واشوفه كبيييير
ويرعاني
يكون سندي في وقت الضعف
يكون فرحي في أحزاني
وألقاه وقت محتاجه
وهو كمان ها يلقاني
هاشيله في حشا روحي
يسيب همه في أحضاني
واديني كبرت ونسيتك
وزعلتك وبكيتك
صنعتي بإيدي أحزانك
لقتني بتوه في أحزاني
بناديكي بدمعاتي
يا رب تكوني سمعاني
أنا خايف أعيش وحدي
أدوب فـ جراحي وأعاني
وأموت ويدفنوني الناس
تقوم الأرض لفظاني
تقول لي هجرت حضن أمك
وأنا رفضاك فـ أحضاني
فأرجوكي تسامحيني
وقولي إنك مسامحاني
