الشاعر.. تامر شاكر
الناس بتبني في الديار أوطان
وانت البعيد قاعد وحيد في "خيطان "
عايش مع اللي فات صدى مكالمات
والتليفونات بتعلّي في الجدران
ومطمناك الكام جنيه حواله
مين اللي قال الوِدّ حصّاله؟
القُرب توب زي الحرير غالي
والبُعد توبه ولو غلِي بالَه
هي الفلوس هتسند امك
لما هتروح للطبيب!؟
يمكن هتديلها الدوا !؟
هتقفّل الشبابيك قوام
وتخاف عليها من الهوا! ؟
طب تفتكر لما أبوك
يزعل شويه من الحياه
ومن الظروف ومن الطريق كُلّه
ويمشّي يتعكز على ضلّه
ويمِلّ من وحدته ووحدته تمِلّه
لما السنين تمحي خطوط السير
والخير يروح للغير .. مين وقتها يدِلّه ؟
الغربه غفله والبعيد واهِم
سكينه سارقه الناس ودبحاهم
ومفرقه أحضان الخلّان
سِم وخدوه وبيحسبوه دواهم!
طعم الحنان لا فـ يوم باعوه ولا ينشريش
زي النهاردا من زمن
كان لك أمل وطموح وروح
لكن النهاردا خلاص مفيش
