مين اللي قال .. أحمد أسامة

مين اللي قال..

إن احنا بنموت ف المعاد!

دا الموت طويل طول الحياة..

وبيبتدي ف يوم الميلاد

الموت عنيد..

بيدب ف الروح من بعيد

الموت وحيد..

ورا كل خطوة لموت جديد!

بنموت وجع..ونموت فراق..

ونموت طمع..ونموت هباء..

ونموت بكسرة نفسنا

ونموت سُلام من أي داء..

إلا الغباء..

ف الأسئلة والأجوبة والإختيار

والانتظار..بالساعة واليوم والسنة..

أيام تهِد اللي اتبنى..من غير أساس..

ولا ناس هتسكن عمرنا..

أو ناس هتسكن بعدنا..

أو ناس خلاص ما بقوش هنا!

لحظة غِنى بعد إحتياج..

نشوة غُنا ف ساعة مزاج..وبتنتهي..

أو تشتهي دمعة عينيك..

عين ع اللي جاي وعين عليك..

داخل شريك..ف الشرب والزاد والنفس

ف اللي دخل واللي خرج..واللي اتحبس

نسمة ونَس للحي من روح اللي راح

وبحور براح..أوسع لعمرك م البدن

فالموت إذاً..هو الحياة

هو الخلود..هو النجاة

هو اللي لازم يسكنك

ويعيش معاك وتموت معاه!!