من كرم الله ... أشرف الشافعي

من كرم الله 
لما ارادته اختارت أبويا ينهي المشوار 
خلاني بعيد 
لا لمحت الموت سارح جواه 
ولا أحزانه ف بدنه بتِنْحَلْ
ولا شُفته ف يوم محني لمرضه ..
قبل مايرحَلْ
ولا فَرِّت من عينه اللى زمان .. 
كات نظرتها بتحضن ملكوت ..
عَبْرة أوجاع 
آخر مرة حضنني بعينه
وبوست جبينه ..
ماكنتش وداع 
قاللى ساعتها :
ياما نفسي أدلَّع ف عيالك 
روح ربنا يصلح حالك ،
ويمِنْ عليك بحِماه ورضاه 
وسافرت وانا مصدق إني .. 
ح ارجع والقاه 
لكنْ كان خطوْ الموت أسبقْ 
وبرغم الحرمان القاتل .. 
من نظرة أخيرة على الجثمان
والوقفة عشان أتلقى عزاه 
فضلت حاجة ..
من وقت ما مات بتعزيني
وتزوّد دايماً ف إيماني 
إني ف مشوارى الجي ح الاقيه ..
ساند ضهرى وبيقويني 
ولحد ماتطمِّن روحه ..
ع الخطوة المكتوبة لقدمي ..
ف بلاد الله
من كرم الله ..
إن أبويا رغم غيابه لما احتاجته .. 
إداني من عِزُه وعِندُه 
وف عز الوقعة اما افتكره ..
باثبت واتسَنِد على زِندُه 
كان في ف موته وانا مش جنبه .. 
حِكمة خفية
خلت سيرته العنبر دايماً .. 
بتفوح فيا 
خلت صورته زى ماهيَّ ..
مافيهاش ولاخدش
حاولت ياما الدنيا تخايله .. 
عاش فيها مناول ..
بس ماخدش، 
غير حب الناس أكبر نياشين 
و لأول مرة أشوف ميت ..
بتطبطب روحه على العايشين 
إستقبل موته بترحابه .. 
واقف ماقعدش !
نفس الراجل..
اللى دنيا عاملاله حساب 
راجل بيرتب فوضى العالم من حواليه 
بـ يادوب .. بصة 
ماكتبش وصية عشان عارف .. 
ربنا باليُتما بيتوصىَ 
واتوشمِت روحه ف أولاده 
ده خد منه ضميره و سمته ..
ودا خد منه كل وسامته 
ودا خد كرمه ورفعةْ هامته 
ودي واخدة العِزَة اللى ف هيبته 
وكأن الروح صبحت 100 روح ..
دبَِت فيهم رغم بُعاده 
حتى ف غيبته ..
نفحة طيبته ..
بترش الخير على أحفاده
من كرم الله 
إنه بيجعل ف قضاه رحمة 
واما بيئذن .. 
وبيبقى مافيش م الموت مهرب 
بيقيم بينا وبين الماشيين .. 
أرحم حاجز 
بيداري حاجات لو شوفناها .. 
يمكن نتمنى اننا نهرب 
ومابيخليش العين تلمح .. 
اللي احنا بننهَلْ من روحهم
واحد فيهم بيبان عايز 
أصعب م الموت إنك تبقى
نِفسَك جداً ..
ولأخر مرة لأحبابك ..
تعمل حاجة، 
وتحس ساعاتها إنك عاجز !