ولا الهوا.... شعر عبدالله صبري

مش قلتلِك؟

الحرب دي محتاجة ناس

يمشوا ف حشود الزمبلِك

وانا وانتي لا بايعنا الزُبير

ولا من رفاق عبدالملِك

ما تصدقيش اللف والبيت الحلال

الليل سؤال

والمنجنيق المنجنيق

الحلم ضيق

وف كل شارع في البلاد حَجَّاج

أشواقنا مكة واحنا مش حُجاج

كل اللي فات أموي

كل اللي جاي نووي

عُمر الفتى الأنوي

حمضي على قلوي

فتعالي نبدأ ثورة التفاح

ونصالح الأسطورة على آدم

العشق جرح ف جبهة العالم

والمؤمنين بالبيعة والحكام

الشمس ندبة ف منتهى الإحكام

بتعذب الضلمة بشروق الخير

وتعاتب الأمة بصباح النور

سيبي الديباجة واكتبي الدستور

أنا وانتي دولة بدون حدود واضحة

قوانينها / ناسها ابقي انظري الصفحة

( أقول لها وقد طارت شعاعًا )

دموعك زيف وفرْحك مش بتاعي

( فَصَبراً في مَجالِ المَوتِ صَبراً )

يا ريت تستمتعي بسوء استماعي

( وَما لِلمَرءِ خَيرٌ في حَياةٍ )

دخلها وسابها من غير أي داعي

___________________

* ما بين الأقواس للشاعر / قطري بن الفجاءة